దొంగతనం కేసులో నలుగురు అరెస్ట్

తూర్పుగోదావరి జిల్లాలు

తాళాలు పగలగొట్టి దొంగతనాల కేసులో నలుగురి అరెస్ట్దుకాణాలు షట్టర్ల తాళాలు పగలగొట్టి వరుస దొంగతనాలకు పాల్పడుతున్న ఒక ముఠాను గోకవరం పోలీసులు పట్టుకొన్నారు. ఈ కేసులో నలుగురిని అదుపులోకి తీసుకుని, వారి వద్ద నుంచి 7 ద్విచక్ర వాహనాలు, దొంగిలించిన బట్టలు, సిగరెట్లు స్వాధీనం చేసుకున్నట్లు కోరుకొండ సీఐ ఎస్.వి.వి.ఎస్. మూర్తి తెలిపారు. గోకవరం మండలం వీరలంకపల్లి సెంటర్ లో ఈనెల 5న అర్ధరాత్రి ఒక షెడ్ తాళాలు పగలగొట్టి, అక్కడి సీసీ కెమెరాను ధ్వంసం చేసి బట్టలు, కళ్లజోళ్లు అపహరించిన ఘటనపై ఎస్పై పవన్ కుమార్ కేసు నమోదు చేసి దర్యాప్తు చేపట్టారు.  దర్యాప్తులో భాగంగా గోకవరం ఠాణా సెంటర్ వద్ద అనుమానితులను అదుపులోకి తీసుకుని విచారించగా పలు దొంగతనాల వ్యవహారం వెలుగులోకి వచ్చినట్లు పోలీసులు తెలిపారు. పోలీసుల అదుపులో ఇరువురు యువకులు, 2 మరో ఇద్దరు మైనర్లు ఉన్నట్లు సీఐ తెలిపారు. మరో నిందితుడు కుంజం అభి పరారీలో ఉన్నాడని, అతని కోసం గాలింపు కొనసాగుతోందన్నారు. నిందితుల నుంచి నేరాలకు సంబంధించిన వస్తువులను స్వాధీనం చేసుకున్నట్లు పోలీసులు తెలిపారు. అలాగే విచారణలో సెప్టెంబర్ 18న వీరలంకపల్లి జంక్షన్ సమీపంలోని టీ షాప్ తాళాలు పగలగొట్టి సుమారు రూ.5 వేల నగదు, సిగరెట్లు దొంగిలించిన కేసులో నిందితులు బయటపడినట్లు వెల్లడించారు. విచారణలో గత ఆగస్టు నుంచి కొంతమూరు- నల్లజర్ల హైవే పరిధిలో సుమారు 7 ద్విచక్ర వాహనాలను దొంగిలించినట్లు గుర్తించినట్లు పోలీసులు తెలిపారు. మొత్తం వాహనాలను స్వాధీనం చేసుకున్నట్లు తెలిపారు.