స్థానిక ఎన్నికలకు క్షేత్రస్థాయిలో సిద్ధం కావాలి కూటమి శ్రేణులు సమష్టిగా పనిచేయాలి ప్రభుత్వ పథకాలను ప్రజల్లోకి తీసుకెళ్లాలి ప్రజావేదిక ఫిర్యాదుల పరిష్కారంపై గ్రామాల వారీగా సమీక్ష ఎమ్మెల్యే ఆరిమిల్లి రాధాకృష్ణ

తణుకు, మేజర్ న్యూస్ : రాబోయే స్థానిక సంస్థల ఎన్నికలకు కూటమి శ్రేణులు క్షేత్రస్థాయి నుంచి సన్నద్ధం కావాలని తణుకు ఎమ్మెల్యే ఆరిమిల్లి రాధాకృష్ణ సూచించారు. కూటమి అభ్యర్థుల విజయానికి నాయకులు, కార్యకర్తలు సమన్వయంతో పనిచేయాలని పిలుపునిచ్చారు.
బుధవారం నియోజకవర్గ స్థాయి పార్టీ శ్రేణులతో నిర్వహించిన సమీక్షలో ఆయన మాట్లాడారు. కూటమి ప్రభుత్వం అధికారంలోకి వచ్చిన తర్వాత చేపట్టిన అభివృద్ధి పనులు, అమలు చేస్తున్న సంక్షేమ కార్యక్రమాలను ప్రజల్లోకి విస్తృతంగా తీసుకెళ్లాలని సూచించారు. నాయకులు గ్రామాల్లో పర్యటిస్తూ ప్రజలకు అందుబాటులో ఉండాలని, స్థానిక సమస్యలను గుర్తించి పరిష్కారానికి చొరవ చూపాలని పేర్కొన్నారు.ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్‌కల్యాణ్, మంత్రి నారా లోకేష్ సమన్వయంతో ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజలకు వివరించాలని పార్టీ శ్రేణులకు సూచించారు.

ప్రజావేదిక ఫిర్యాదులపై ఆరా....

నెలవారీ సమీక్షలో భాగంగా ప్రజావేదికకు వచ్చిన ఫిర్యాదుల పరిష్కారంపై ఎమ్మెల్యే ప్రత్యేకంగా దృష్టి సారించారు. గ్రామాల వారీగా సమస్యలు, వాటి పరిష్కారానికి తీసుకున్న చర్యలను నాయకులను అడిగి తెలుసుకున్నారు. ప్రజలు ఇచ్చిన ఫిర్యాదులను సంబంధిత అధికారుల దృష్టికి తీసుకెళ్లడంతో సరిపెట్టకుండా, పరిష్కారం అయ్యే వరకు అనుసరించాలని సూచించారు.
స్థానిక ఎన్నికల సన్నద్ధత, పార్టీ కార్యకలాపాలు, గ్రామస్థాయి ప్రజా సమస్యలపై సమావేశంలో చర్చించారు. కూటమి నాయకులు, కార్యకర్తలు తదితరులు పాల్గొన్నారు.