దారి తీసి.. చెరువు మింగి: గురువర్యుడి కబ్జా దర్బార్!

జేసీబీలతో ప్రభుత్వ రోడ్డు ధ్వంసం.. చెరువు గర్భం ఆక్రమణకు యత్నం

అచ్యుతాపురంలో ఉపాధ్యాయుడి బరితెగింపుపై గ్రామస్థుల ఆగ్రహం

పాతపట్నం అక్టోబర్ 13,మేజర్ న్యూస్:

విద్యాబుద్ధులు నేర్పి సమాజానికి ఆదర్శంగా నిలవాల్సిన ఓ ఉపాధ్యాయుడు ఆక్రమణల బాట పట్టి బరితెగించిన ఘటన పాతపట్నం మండలం అచ్యుతాపురంలో తీవ్ర కలకలం రేపుతోంది. గ్రామంలోని ముత్యాలమ్మ వీధిలో రాకపోకలకు ఆధారంగా ఉన్న ప్రభుత్వ రహదారిని సదరు ఉపాధ్యాయుడు జేసీబీ యంత్రాలతో దర్జాగా తవ్వించి ధ్వంసం చేయడమే కాకుండా, పక్కనే ఉన్న చెరువు గర్భాన్ని ఆక్రమించేందుకు తెగబడ్డాడు. సర్వే నంబర్ 10/5 పరిధిలోని స్థలానికి సంబంధించి ఇప్పటికే రికార్డుల్లో ఏడు అడుగుల స్థలం తేడా ఉండటంతో వివాదం నడుస్తోంది. ఆ వివాదం కొలిక్కి రాకముందే, రెవెన్యూ నిబంధనలు తుంగలో తొక్కి రోడ్డును కత్తిరించడంపై స్థానికులు మండిపడుతున్నారు. రాజకీయ అండదండల ధీమాతోనే ఈ దౌర్జన్యానికి దిగినట్లు ఆరోపణలు వెల్లువెత్తుతున్నాయి. అధికారులు తక్షణమే స్పందించి ధ్వంసమైన రహదారిని పునరుద్ధరించాలని, ఆక్రమణలకు పాల్పడిన ఉపాధ్యాయుడిపై శాఖాపరమైన, క్రిమినల్ చర్యలు తీసుకోవాలని గ్రామస్థులు డిమాండ్ చేస్తున్నారు.