డాక్టర్ హేమాక్షి ని ఘనంగా సన్మానించిన బూర్జ గ్రామస్తులు

సీతానగరం, సూర్య : విస్తృత ఆయుష్ సేవలకు గుర్తింపుగా పలు అవార్డులతో పాటుగా బూర్జ ఆయుర్వేద వైద్యశాలకు స్వచ్ఛ ఆంధ్ర అవార్డు సాధించిన ఆయుష్ వైద్యాధికారిణి డాక్టర్ టి. హేమాక్షి ని గ్రామస్థులు బుధవారం ఘనంగా సన్మానించి అభినందనలు తెలియజేశారు. ఆసుపత్రిని పరిశుభ్రంగా, ఆహ్లాదకరంగా తీర్చి దిద్ది, ఆవరణలో పలు ఔషధ మొక్కలు నాటి వాటి నిర్వహణ బాధ్యత చేపడుతూ, ఉపయోగాలపై అవగాహన కల్పిస్తూ ఇటు ఆసుపత్రిలో రోగులకు సేవలతో పాటు , క్షేత్ర స్థాయిలో వైద్య శిబిరాలు, అవగాహన కార్యక్రమాలతో ఆయుష్ సేవలను విస్తృతం చేయడంలో డాక్టర్ హేమాక్షి కీలక పాత్ర పోషించారని గ్రామస్తులు కొనియాడారు. ఏభై ఏళ్లకు పైగా చరిత్ర కలిగిన బూర్జ ఆయుర్వేద వైద్యశాలకు డాక్టర్ హేమాక్షి విశిష్ట సేవలతో మంచి గుర్తింపు తెచ్చారని, ఇక్కడే పుట్టి విద్యాభ్యాసం చేసి జిల్లా స్థాయిలో పేరు,ప్రఖ్యాతులు గడించారని, గ్రామానికే ఎంతో గర్వకారణమని టిడిపి నాయకులు పరువాడ. అచ్యుత నాయుడు ప్రశంసించారు. తమ శిష్యురాలు వైద్య వృత్తిలో ఎన్నో ప్రశంసలు అందుకోవడం, ఆసుపత్రికి గుర్తింపు తీసుకురావడం ఆనందదాయకమని స్థానిక రిటైర్డ్ ప్రధానోపాధ్యాయులు అల్లక. శంకరరావు మాస్టారు కొనియాడారు. వీరితో పాటు మాజీ సర్పంచ్ గుజ్జల. దాసు, గ్రామస్తులు, కుటుంబ సభ్యులు, వైద్య సిబ్బంది ఆమె సేవలను కొనియాడుతూ భవిష్యత్తులో మరింత గుర్తింపు పొందాలని ఆశీస్సులు అందజేశారు. ఉన్నతాధికారులు ఆదేశాలు, సూచనలు అమలు చేస్తూ  ప్రజారోగ్యమే ద్యేయంగా ఆయుష్ సేవలను మరింతగా విస్తృతం చేస్తామని డాక్టర్ హేమాక్షి ఈ సందర్భంగా అన్నారు. గ్రామస్తులకు ధన్యవాదాలు తెలిపారు.

రిపోర్టర్ : పిల్లి సతీష్ కుమార్, సీతనగరం, పార్వతీపురం మన్యం.