చెరువులో మునిగి బాలుడి దుర్మరణం.

పాతపట్నం మండలం ప్రహరాజపాలెంలో తీవ్ర విషాదం

పాతపట్నం నవంబర్ 14,మేజర్ న్యూస్:

పాతపట్నం మండలం ప్రహరాజపాలెం గ్రామానికి చెందిన బంటుపల్లి భాస్కరరావు (13) అనే బాలుడు శనివారం మధ్యాహ్నం ప్రమాదవశాత్తు చెరువులో పడి మృతి చెందాడు. స్థానికులు, పోలీసుల వివరాల ప్రకారం.. భాస్కరరావు మధ్యాహ్నం సమయంలో కోడూరు గ్రామం వైపు వెళ్లే రహదారి పక్కన ఉన్న చెరువులోకి స్నానానికి దిగాడు. ఈ క్రమంలో ప్రమాదవశాత్తు లోతుకు వెళ్లడంతో నీటిలో మునిగి ఊపిరాడక మరణించాడు. గమనించిన స్థానికులు, కుటుంబ సభ్యులు బాలుడిని వెలికితీసి హుటాహుటిన పాతపట్నం సామాజిక ఆరోగ్య కేంద్రానికి (CHC) తరలించగా, అప్పటికే మృతి చెందినట్లు వైద్యులు నిర్ధారించారు. ఈ ఘటనపై సమాచారం అందుకున్న పాతపట్నం పోలీసులు ఆసుపత్రికి చేరుకుని మృతదేహాన్ని పరిశీలించి, కేసు నమోదు చేసి దర్యాప్తు చేపట్టారు. అల్లారుముద్దుగా పెంచుకున్న కుమారుడు కళ్లముందే విగతజీవిగా మారడంతో తల్లిదండ్రులు కన్నీరుమున్నీరుగా విలపిస్తుండగా, ప్రహరాజపాలెం గ్రామంలో విషాద ఛాయలు అలుముకున్నాయి.