అవనిగడ్డ ఆర్టీసీ డిపోలో సుస్థిర జీవనశైలి వారోత్సవాలు ప్రారంభం
అవనిగడ్డ, మేజర్ న్యూస్: కేంద్ర, రాష్ట్ర ప్రభుత్వాల ఆదేశాల మేరకు ఏపీఎస్ఆర్టీసీ అవనిగడ్డ డిపోలో బ్రిక్స్‌ సుస్థిర జీవనశైలి వారోత్సవాలు ఆదివారం ప్రారంభమయ్యాయి. నవంబర్‌ 1 నుంచి 7వ తేదీ వరకు నిర్వహించే ఈ వారోత్సవాల్లో భాగంగా తొలిరోజు ఉద్యోగులకు యోగా తరగతులు నిర్వహించారు.
యోగా గురువు మానేపల్లి వేణుగోపాల్‌ ఉద్యోగులతో యోగాసనాలు వేయించి, నిత్యం యోగా చేయడం వల్ల కలిగే ప్రయోజనాలను వివరించారు. ఆరోగ్య పరిరక్షణకు యోగా ఎంతో దోహదపడుతుందని తెలిపారు.
డిపో మేనేజర్‌ కె. హనుమంతరావు మాట్లాడుతూ యోగాను దైనందిన జీవితంలో భాగం చేసుకోవాలని సూచించారు. యోగా ద్వారా శారీరక ఆరోగ్యం, మానసిక ప్రశాంతత, ఏకాగ్రత పెరుగుతాయని పేర్కొన్నారు. డ్రైవర్లు, కండక్టర్లు, ఇతర సిబ్బంది ఆరోగ్య పరిరక్షణకు యోగా, వ్యాయామం అలవాటు చేసుకోవాలని, పర్యావరణ పరిరక్షణతోపాటు ప్రకృతి వనరులను పొదుపుగా వినియోగించాలని పిలుపునిచ్చారు.
వారోత్సవాల్లో భాగంగా ఈ నెల 2న ఇంధన పొదుపు, 3న నీటి పొదుపు, ఆహార వినియోగ విధానం, 4న ఆహార పరిరక్షణ, 5న సింగిల్‌ యూజ్‌ ప్లాస్టిక్‌ నిర్మూలన, 6న ఎలక్ట్రానిక్‌ వ్యర్థాల నిర్వహణ, 7న ఇతర వ్యర్థాల నిర్మూలనపై అవగాహన కార్యక్రమాలు నిర్వహించనున్నారు.అనంతరం బస్‌స్టేషన్‌ ఆవరణలో సిబ్బంది మొక్కలు నాటారు. ఈ కార్యక్రమంలో అసిస్టెంట్‌ మేనేజర్లు సీహెచ్‌. శ్రీలక్ష్మి (ట్రాఫిక్‌), ఎం. దివ్య (మెకానికల్‌), ఆఫీస్‌ డిప్యూటీ సూపరింటెండెంట్‌ పి. శ్రీధర్‌, వివిధ యూనియన్ల నాయకులు, సుమారు 50 మంది ఉద్యోగులు పాల్గొన్నారు.✍️ అజంతా శ్రీనివాస్, అవనిగడ్డ, కృష్ణాజిల్లా.
