అనకాపల్లిలో రెచ్చిపోతున్న భూ రాబందులు.

రిటైర్డ్ తహసీల్దార్ భూమికే ఎసరు - అక్రమంగా రికార్డుల టాంపరింగ్.

మా పిత్రార్జిత భూమిలోకి వస్తే చర్యలు తప్పవు.
 

- బాధితుడు కొణతాల సత్యనారాయణ

జిల్లాలో భూ కబ్జాదారుల ఆగడాలు రోజురోజుకూ శృతిమించుతున్నాయి. ఏకంగా రెవెన్యూ శాఖలో తహసీల్దార్ గా పనిచేసి రిటైర్డ్ అయిన వ్యక్తి భూమిని సైతం కబ్జాదారులు వదలడం లేదు. అనకాపల్లి పట్టణానికి చెందిన కొణతాల సత్యనారాయణ సోమవారం సాయంత్రం సీపీఐ కార్యాలయంలో విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ... "నా తండ్రి కొణతాల శ్రీరాములు ఇదే జిల్లాలో తహసీల్దార్ గా పనిచేసి 1991లో రిటైర్డ్ అయ్యారు. ఆయన నుంచి వారసత్వంగా అనకాపల్లి పట్టణం సౌత్-టూ రెవెన్యూ పరిధిలోని సర్వే నెంబర్ 1295/7 లో గల 0.79 సెంట్ల భూమి వీలునామా ద్వారా నాకు దఖలు పడింది. నేను కూడా స్టేట్ బ్యాంక్ ఆఫ్ ఇండియాలో బ్రాంచ్ మేనేజర్ గా పనిచేసి రిటైర్డ్ అయ్యాను. రిటైర్డ్ అయ్యాక పిల్లల చదువులు, పెళ్లిళ్ల కారణంగా పాస్ పుస్తకాలకు దరఖాస్తు చేసుకోలేదు. 2021లో వెబ్ ల్యాండ్ అడంగల్ లో చెక్ చేస్తే మా నాన్న పేరు మీదనే రికార్డు ఉంది. కానీ 2023లో మాకు తెలియకుండానే రికార్డు మార్పు జరిగింది. ఈ విషయంపై జిల్లా కలెక్టర్ వద్ద పీజీఆర్ఎస్ లో ఫిర్యాదు చేయగా, సదరు భూమి పూర్తి విస్తీర్ణం కర్రి నూకల తల్లి పేరున వెబ్ ల్యాండ్ లో నమోదు అయినట్లు ఎండార్స్ మెంట్ ఇచ్చారు. ఎస్.ఎఫ్.ఏ రికార్డుల నుంచి మా తాత కొణతాల అప్పలనాయుడు పేరున, 2021 వరకు కొణతాల శ్రీరాములు పేరున ఉన్న రికార్డు ఎలా మారిందో చెప్పాలని కోరుతున్నాను" అని అన్నారు. ప్రస్తుతం తమ భూమిలోకి అనకాపల్లి గవరపాలెం ప్రాంతానికి చెందిన కొణతాల రాము, రామారావు అనే వ్యక్తులు అక్రమంగా ప్రవేశిస్తున్నారని, వారిపై టౌన్ పోలీస్ స్టేషన్ లోనూ, జిల్లా ఎస్పీ కార్యాలయంలోనూ ఫిర్యాదు చేశామని తెలిపారు. మాకు పిత్రార్జితంగా వచ్చిన భూముల్లోకి ఎవరైనా అక్రమంగా చొరబడితే న్యాయపరమైన చర్యలు తీసుకోవడానికి వెనుకాడబోమని ఈ సందర్భంగా హెచ్చరించారు.

రవికుమార్ 

ఎన్ డి పి సూర్య ప్రతినిధి