16వ జాతీయ సీనియర్ హాకీ టోర్నమెంట్‌కు నంద్యాల యువ క్రీడా కారుడు శ్రావణ్ కుమార్ ఎంపిక
సూర్య, నంద్యాల బ్యూరో:
ఉత్తరప్రదేశ్ రాష్ట్రంలోని ఝాన్సీ జిల్లా వేదికగా జరుగుతున్న 16వ జాతీయ సీనియర్ మెన్ హాకీ ఛాంపియన్‌షిప్ పోటీలకు ఆంధ్రప్రదేశ్ జట్టు తరఫున నంద్యాల జిల్లాకు చెందిన క్రీడాకారుడు శ్రావణ్ కుమార్ ఎంపికయ్యారు. ఈ విషయాన్ని హాకీ ఆంధ్రప్రదేశ్ అధ్యక్షుడు చాణిక్య రాజు అధికారికంగా ప్రకటించారు.
ఈ నెల 10వ తేదీ నుండి 22వ తేదీ వరకు ఈ జాతీయ స్థాయి పోటీలు కొనసాగనున్నాయి. టోర్నమెంట్‌లో భాగంగా అక్టోబర్ 10న జరిగిన ప్రారంభ మ్యాచ్‌లో ఆంధ్రప్రదేశ్ జట్టు గుజరాత్ జట్టుతో తలపడింది. ఈ హోరాహోరీ పోరులో ఆంధ్రప్రదేశ్ జట్టు 8-0 గోల్స్ తేడాతో గుజరాత్‌పై అఖండ విజయాన్ని నమోదు చేసింది.
ఈ మ్యాచ్‌లో నంద్యాల క్రీడాకారుడు శ్రావణ్ కుమార్ అత్యుత్తమ ప్రతిభ కనబరచడం పట్ల హాకీ ఆంధ్రప్రదేశ్ అధ్యక్షుడు చాణిక్య రాజు హర్షం వ్యక్తం చేశారు. ఈ సందర్భంగా శ్రావణ్ కుమార్‌తో పాటు మొత్తం ఆంధ్రప్రదేశ్ జట్టును ఆయన ప్రత్యేకంగా అభినందించారు. రాబోయే రోజుల్లో జరగనున్న మిగతా మ్యాచ్‌లలోనూ ఇదే జోరు కొనసాగించి, జట్టు ఘన విజయం సాధించాలని ఆకాంక్షించారు.
*మధుబాబు, సూర్య బ్యూరో ఇంచార్జి, నంద్యాల జిల్లా*
