15 ప్రాంతాల్లో సేవా సేతు అభియాన్ శిబిరాలు

విజయవాడ,  మేజర్ న్యూస్ : పీఎం సూర్య ఘర్ పథకంపై అవగాహన కల్పించేందుకు ఎన్‌టీఆర్ జిల్లాలోని నాలుగు సబ్‌డివిజన్ల పరిధిలో 15 ప్రాంతాల్లో అక్టోబర్ 6, 7, 8 తేదీల్లో సేవా సేతు అభియాన్ శిబిరాలు నిర్వహించనున్నట్లు జిల్లా కలెక్టర్ డా. జి. లక్ష్మీశ తెలిపారు. సోమవారం కలెక్టరేట్‌లో జాయింట్ కలెక్టర్ ఎస్. ఇలక్కియ, డీఆర్‌వో ఎం. లక్ష్మీనరసింహంతో కలిసి శిబిరాల పోస్టర్‌ను ఆవిష్కరించారు. రూఫ్‌టాప్ సౌర విద్యుత్‌ ప్లాంట్ల ఏర్పాటుతో విద్యుత్ బిల్లులు తగ్గించుకోవడంతో పాటు పునరుత్పాదక ఇంధనాన్ని ప్రోత్సహించవచ్చన్నారు. అర్హత కలిగిన గృహ వినియోగదారులకు కేంద్ర ప్రభుత్వం కిలోవాట్‌కు రూ.30 వేల నుంచి గరిష్ఠంగా రూ.78 వేల వరకు రాయితీ అందిస్తుందని తెలిపారు. శిబిరాల్లో పథకం అర్హతలు, దరఖాస్తు విధానం, రాయితీ, సౌర విద్యుత్‌ ప్లాంట్ల ఏర్పాటు, నెట్ మీటరింగ్‌పై అవగాహన కల్పించడంతో పాటు వినియోగదారుల సందేహాలను నివృత్తి చేస్తారని అధికారులు తెలిపారు. అర్హులైన ప్రతి ఒక్కరూ ఈ అవకాశాన్ని సద్వినియోగం చేసుకోవాలని కలెక్టర్ సూచించారు.

✍️ ప్రేమ్ రాజ్, విజయవాడ.