సింగరేణిలో రూ.3 వేల కోట్ల బొగ్గు స్కామ్‌.. సీఎం రేవంత్‌రెడ్డికి కేటీఆర్ బహిరంగ లేఖ
సూర్య ప్రతినిధి, హైదరాబాద్ :తెలంగాణ ముఖ్యమంత్రి రేవంత్‌రెడ్డికి బీఆర్ఎస్ కార్యనిర్వాహక అధ్యక్షుడు కేటీఆర్ సంచలన బహిరంగ లేఖ రాశారు. విదేశీ బొగ్గు దిగుమతి పేరుతో సింగరేణి సంస్థలో ఏకంగా రూ.3,000 కోట్ల మేర భారీ కుంభకోణానికి తెరలేపారని ఆయన తీవ్రస్థాయిలో ఆరోపించారు. కృత్రిమంగా బొగ్గు కొరతను, విద్యుత్ సంక్షోభాన్ని సృష్టించి.. 'భోత్రా లాజిస్టిక్స్' అనే సంస్థతో ప్రభుత్వం రహస్య ఒప్పందం చేసుకుందని కేటీఆర్ మండిపడ్డారు.
ఈ లేఖలో కేటీఆర్ లేవనెత్తిన ప్రధానాంశాలు:
* రహస్య ఒప్పందాలు బయటపెట్టాలి: విదేశీ బొగ్గు దిగుమతి కోసం చేసుకున్న ఒప్పందాలన్నింటినీ ప్రభుత్వం తక్షణమే బహిర్గతం చేయాలని, భోత్రా లాజిస్టిక్స్ సంస్థను ఏ ప్రాతిపదికన ఎంపిక చేశారో ముఖ్యమంత్రి రేవంత్‌రెడ్డి ప్రజలకు సమాధానం చెప్పాలని డిమాండ్ చేశారు.
* స్వతంత్ర విచారణ కావాలి: విదేశీ బొగ్గు కొనుగోళ్లు, ఒప్పందాలపై నిష్పాక్షికంగా ఒక స్వతంత్ర సంస్థతో సమగ్ర విచారణ జరిపించాలని కోరారు.
* సింగరేణికి బకాయిలు చెల్లించాలి: రాష్ట్ర ప్రభుత్వం సింగరేణికి చెల్లించాల్సిన రూ.60,000 కోట్ల బకాయిలను వెంటనే విడుదల చేయాలని స్పష్టం చేశారు.
* దేశీయ సంస్థలకు అన్యాయం: విదేశీ బొగ్గు దిగుమతుల కోసం మన దేశీయ సంస్థల ప్రయోజనాలను, సింగరేణి ఉనికిని పూర్తిగా పక్కన పెడుతున్నారని ఆవేదన వ్యక్తం చేశారు.
* కాంగ్రెస్ - బీజేపీ కుట్రలు: తెలంగాణ ఇంధన రంగాన్ని, సింగరేణిని దెబ్బతీసేందుకు కాంగ్రెస్, బీజేపీలు చేస్తున్న కుట్రలను చూస్తూ ఊరుకోబోమని కేటీఆర్ హెచ్చరించారు.
