రూ.3 లక్షలకు నకిలీ బంగారం..!

తొలుత అసలైన బంగారం చూపించి నమ్మించారు.. ఆపై నకిలీ బంగారం అంటగట్టారు

నలుగురు అరెస్ట్.. రూ.2 లక్షల నగదు, నకిలీ బంగారం బిస్కెట్లు స్వాధీనం

వికారాబాద్ జిల్లా ప్రతినిధి, మేజర్ న్యూస్:
తక్కువ ధరకే బంగారం ఇస్తామని నమ్మించి రూ.3 లక్షలు తీసుకుని నకిలీ బంగారం అప్పగించిన మోసం కేసును పరిగి పోలీసులు ఛేదించారు. ఈ కేసులో నలుగురు నిందితులను అరెస్ట్ చేసి వారి వద్ద నుంచి రూ.2 లక్షల నగదు, నకిలీ బంగారం బిస్కెట్లు, నేరానికి ఉపయోగించిన వస్తువులను స్వాధీనం చేసుకున్నారు.పోలీసుల వివరాల ప్రకారం.. పరిగి పోలీస్‌స్టేషన్ పరిధిలోని తొండపల్లి గ్రామానికి చెందిన కంద్యానం రామస్వామి ‘శ్రీ మాత టైలరింగ్ & లేడీస్ కార్నర్’ నిర్వహిస్తున్నారు. ఈ క్రమంలో ఓ మహిళ తరచూ దుకాణానికి రావడంతో ఆమెతో పరిచయం ఏర్పడింది. అనంతరం ఆమెతో పాటు మరికొందరు రామస్వామికి పరిచయమై తమ వద్ద పెద్ద మొత్తంలో బంగారం ఉందని, అత్యవసరంగా డబ్బు అవసరం కావడంతో మార్కెట్ ధర కంటే తక్కువకే బంగారం ఇస్తామని నమ్మించారు.నమ్మకం కలిగించేందుకు తొలుత అసలైన బంగారం ముక్కను చూపించారు. దానిని రామస్వామి షాబాద్, లాలాపేట ప్రాంతాల్లోని బంగారు దుకాణాల్లో పరీక్షించగా అసలైన బంగారమేనని తేలింది. దీంతో నిందితులపై ఆయనకు పూర్తిగా నమ్మకం ఏర్పడింది.ఈ నమ్మకాన్ని ఆసరాగా చేసుకున్న నిందితులు పెద్ద మొత్తంలో బంగారం ఉందని చెప్పి సెప్టెంబర్ 7న తొండపల్లికి వచ్చారు. బంగారం ఇస్తామని చెప్పి రామస్వామి నుంచి రూ.3 లక్షలు నగదు తీసుకుని, బంగారం మాదిరిగా కనిపించే వస్తువును అప్పగించారు. అనంతరం దానిని బంగారు దుకాణంలో పరీక్షించగా నకిలీ బంగారం అని తేలింది. దీంతో బాధితుడు పరిగి పోలీసులను ఆశ్రయించారు.

సాంకేతిక ఆధారాలతో పట్టివేత

బాధితుడి ఫిర్యాదుతో పరిగి పోలీసులు క్రైం నంబర్ 334/2026 కింద కేసు నమోదు చేసి దర్యాప్తు చేపట్టారు. జిల్లా ఎస్పీ స్నేహ మెహ్రా, ఐపీఎస్ ఆదేశాల మేరకు సీసీఎస్ ఇన్‌స్పెక్టర్ బల్వంత్ రాయ్ ఆధ్వర్యంలో సీసీఎస్, పరిగి పోలీసులు సమన్వయంతో దర్యాప్తు కొనసాగించారు. సాంకేతిక ఆధారాలు, ఫోన్ సమాచారం, నిందితుల కదలికలను విశ్లేషించి వారి ఆచూకీ గుర్తించారు.నిందితులు ఆంధ్రప్రదేశ్‌లోని పల్నాడు జిల్లా ముప్పాళ్ల పోలీస్‌స్టేషన్ పరిధి మాడాల గ్రామానికి చెందిన **బండారు నాగభూషణం (40), తమ్మిశెట్టి నాగరాజు (45), దేవళ్ల శివమ్మ (50), బండారు నాగలక్ష్మి (30)**గా గుర్తించారు. వారిని అరెస్ట్ చేసి రూ.2 లక్షల నగదు, నకిలీ బంగారం బిస్కెట్లు, సుత్తె, శణాలు తదితర వస్తువులను స్వాధీనం చేసుకున్నట్లు పోలీసులు తెలిపారు.

ఆశ కంటే ముందు జాగ్రత్త

ఈ సందర్భంగా జిల్లా ఎస్పీ స్నేహ మెహ్రా మాట్లాడుతూ.. మార్కెట్ ధర కంటే చాలా తక్కువకు బంగారం ఇస్తామని అపరిచిత వ్యక్తులు చెబితే వెంటనే నమ్మవద్దని సూచించారు. బంగారం కొనుగోలు చేసే ముందు గుర్తింపు పొందిన బంగారు వ్యాపారి లేదా నిపుణుడి వద్ద వస్తువు నిజమైన బంగారమేనా అనే విషయాన్ని పూర్తిగా నిర్ధారించుకోవాలని తెలిపారు. సరైన ధృవీకరణ లేకుండా పెద్ద మొత్తంలో నగదు చెల్లించవద్దని, అనుమానాస్పద లావాదేవీలు లేదా మోసం జరిగిన వెంటనే పోలీసులకు సమాచారం అందించాలని సూచించారు.“తక్కువ ధరకు బంగారం వస్తుందనే ఆశ కంటే.. మన డబ్బు భద్రత ముఖ్యం. నమ్మకం కంటే ముందు ధృవీకరణ ఉండాలి.. ఆశ కంటే ముందు జాగ్రత్త ఉండాలి.” అని ఎస్పీ పేర్కొన్నారు.