*గంజాయి కేసులో 3ఏండ్ల జైలు శిక్ష.. 10వేలు జరిమానా*

*ఖమ్మం జిల్లా మధిరకు చెందిన ముగ్గురు యువకులకు గంజాయి అక్రమ రవాణా కేసులో మూడేళ్ల జైలు శిక్ష విధించబడింది.*

మధిర, సూర్య మేజర్ న్యూస్.

 

గంజాయి అక్రమ రవాణా
కేసులో ముగ్గురు నిందితులకు మూడేళ్ల జైలు శిక్షతో పాటు ఒక్కొక్కరికి రూ.10 వేల చొప్పున జరిమానా విధిస్తూ  జిల్లా సెషన్స్ కోర్టు తీర్పు వెలువరించింది. కేసు వివరాలు.... 2024 ఆగస్టు 2న ఒడిశా నుంచి 2.5 కిలోల గంజాయిని అక్రమంగా తరలిస్తూ ముగ్గురు వ్యక్తులు మధిరలో పోలీసులకు పట్టుబడ్డారు. ఈ ఘటనపై మధిర టౌన్ పోలీస్ స్టేషన్లో క్రైమ్ నంబర్ 133/2024గా కేసు నమోదైంది. ఎన్టీపీఎస్ చట్టం-1985లోని సెక్షన్ 8(సి ) రెడ్విత్ 20(బి )(ii)(బి ) కింద పోలీసులు కేసు నమోదు చేసి దర్యాప్తు చేపట్టారు. ఈ కేసులో మధిరకు చెందిన కల్యాణపు వంశీ (20), తమ్మిశెట్టి కిరణ్ (19), రెంటపల్లి మహేష్ ఆనంద్ (20) నిందితులుగా ఉన్నారు. విచారణలో వీరిపై నేరం రుజువు కావడంతో ముగ్గురికీ మూడేళ్ల చొప్పున జైలు శిక్షతో పాటు ఒక్కొక్కరికి రూ.10 వేల జరిమానా విధిస్తూ న్యాయస్థానం తీర్పు వెల్లడించింది.ఈ కేసుతో సంబంధం ఉన్న ఒడిశా ప్రాంతానికి చెందిన హంతాల్ మధు పరారీలో ఉన్నట్లు పోలీసులు వెల్లడించారు. కేసు దర్యాప్తును ఇన్స్పెక్టర్లు దోమల రమేష్, . డి. మధు నిర్వహించగా, అదనపు పబ్లిక్ ప్రాసిక్యూటర్ జమ్ముల శరత్ కుమార్ రెడ్డి కోర్టులో వాదనలు వినిపించారు. కేసులో సమర్థవంతంగా విధులు నిర్వహించిన కోర్టు లైజన్ అధికారి ఎస్ఐ కె. శ్రీకాంత్, కోర్టు డ్యూటీ ఆఫీసర్ నాగేశ్వరరావు, హోంగార్డు అయాబ్ను ఖమ్మం పోలీస్ కమిషనర్ సునీల్ దత్ అభినందించారు.

*మధిర టౌన్ ఇన్స్పెక్టర్ డి రమేష్ విజ్ఞప్తి*

యువత గంజాయి మరియు ఇతర మాదక ద్రవ్యాలకు బానిసై తమ విలువైన భవిష్యత్తును మరియు జీవితాలను నాశనం చేసుకోవద్దని సూచించారు.
మాదక ద్రవ్యాల వినియోగం వ్యక్తిగత ఆరోగ్యంతో పాటు కుటుంబం మరియు సమాజంపై కూడా తీవ్ర ప్రతికూల ప్రభావం చూపుతుందని తెలిపారు. యువత మాదక ద్రవ్యాలకు దూరంగా ఉండి, తమ భవిష్యత్తుపై దృష్టి సారించాలని కోరారు.
అదేవిధంగా, మధిర పట్టణ పరిధిలో ఎవరైనా గంజాయి లేదా ఇతర మాదక ద్రవ్యాలను విక్రయిస్తున్నా, సరఫరా చేస్తున్నా లేదా వినియోగిస్తున్నా, వారి సమాచారాన్ని వెంటనే పోలీసులకు తెలియజేయాలని ప్రజలను కోరారు.