ధాన్యం కొనుగోళ్లకు పకడ్బందీ ఏర్పాట్లు రైతులకు ఇబ్బందులు లేకుండా చర్యలు: అదనపు కలెక్టర్ శ్రీరాములు

 సూర్య పెద్దపల్లి ప్రతినిధి

ఖరీఫ్–2026 ధాన్యం కొనుగోళ్లకు అవసరమైన అన్ని ఏర్పాట్లను ముందస్తుగా పూర్తి చేసి, రైతులకు ఎలాంటి ఇబ్బందులు కలగకుండా చర్యలు చేపట్టాలని అదనపు కలెక్టర్ బి. శ్రీరాములు అధికారులను ఆదేశించారు. బుధవారం సమీకృత జిల్లా కలెక్టరేట్‌లో ధాన్యం కొనుగోళ్లపై అధికారులతో సమీక్ష నిర్వహించారు.
మండలాల వారీగా పంట కోతల షెడ్యూల్‌కు అనుగుణంగా కొనుగోలు కేంద్రాలను ప్రారంభించి, గన్నీ బ్యాగులు, తూకం యంత్రాలు, తేమ శాతం కొలిచే పరికరాలు, ధాన్యం శుభ్రపరిచే యంత్రాలు అందుబాటులో ఉంచాలని సూచించారు. ఎఫ్‌ఏక్యూ నాణ్యత ప్రమాణాలపై రైతులకు అవగాహన కల్పించాలని, కొనుగోలు కేంద్రాల ఇన్‌చార్జ్‌లకు అవసరమైన శిక్షణ ఇవ్వాలని ఆదేశించారు. శాఖల మధ్య సమన్వయంతో కొనుగోళ్ల ప్రక్రియ సజావుగా జరిగేలా చూడాలని తెలిపారు.
ఈ సమావేశంలో జిల్లా పౌరసరఫరాల శాఖ అధికారి శ్రీనాథ్, జిల్లా పౌరసరఫరాల సంస్థ మేనేజర్ శ్రీకాంత్, జిల్లా మార్కెటింగ్ అధికారి ప్రవీణ్ రెడ్డి, జిల్లా సహకార అధికారి శ్రీమాల, ఎస్‌డబ్ల్యూసీ రీజినల్ మేనేజర్, సంబంధిత శాఖల అధికారులు ,తదితరులు పాల్గొన్నారు.