అధికారులకే ఎదురుతిరిగిన లైన్మెన్…!
విద్యుత్ సమస్యలు చెప్పిన గ్రామస్థులపై ఆగ్రహం.. ఉన్నతాధికారులు, సర్పంచ్లపై అనుచిత వ్యాఖ్యల ఆరోపణలు
వెంకటయ్యపై శాఖాపరమైన చర్యలు తీసుకోవాలని గ్రామస్థుల డిమాండ్
దోమ, మేజర్ న్యూస్ (సెప్టెంబర్ 24):
ప్రజా సమస్యలను పరిష్కరించాల్సిన విద్యుత్ శాఖ ఉద్యోగి తీరుపై దోమ మండలంలోని బ్రాహ్మణపల్లి, బ్రాహ్మణపల్లి పెద్దతాండ, గొట్లచెల్క తాండ గ్రామాల ప్రజలు తీవ్ర ఆగ్రహం వ్యక్తం చేస్తున్నారు. గ్రామాల్లో నెలకొన్న విద్యుత్ సరఫరా సమస్యలను ఉన్నతాధికారుల దృష్టికి తీసుకెళ్లినందుకు స్థానిక లైన్మెన్ వెంకటయ్య ఆగ్రహంతో స్పందించి, ఉన్నతాధికారులు, ప్రజాప్రతినిధులను కించపరిచేలా మాట్లాడినట్లు గ్రామస్థులు ఆరోపిస్తున్నారు.గత కొంతకాలంగా ఆయా గ్రామాల్లో విద్యుత్ సరఫరాకు సంబంధించి తరచూ సమస్యలు తలెత్తుతున్నాయని గ్రామస్థులు తెలిపారు. ఈ విషయాన్ని పలుమార్లు స్థానిక లైన్మెన్ వెంకటయ్య దృష్టికి తీసుకెళ్లినా సమస్యలు పరిష్కారం కాలేదని పేర్కొన్నారు. దీంతో గ్రామ సర్పంచ్లు, గ్రామస్థులు కలిసి విద్యుత్ శాఖ ఏడీ దృష్టికి సమస్యలను తీసుకెళ్లినట్లు తెలిపారు.తమపై ఉన్నతాధికారికి ఫిర్యాదు చేశారనే ఆగ్రహంతో లైన్మెన్ వెంకటయ్య తమతో అనుచితంగా మాట్లాడినట్లు గ్రామస్థులు ఆరోపిస్తున్నారు. “నాకు ఏడీ ఏమీ చేయలేడు.. సర్పంచ్ కూడా నన్నేమీ చేయలేడు” అంటూ ఆయన మాట్లాడినట్లు వారు పేర్కొన్నారు. అయితే ఈ వ్యాఖ్యలకు సంబంధించిన పూర్తి వాస్తవాలు, సందర్భంపై విద్యుత్ శాఖ అధికారులు విచారణ జరిపితేనే స్పష్టత వస్తుందని గ్రామస్థులు అంటున్నారు.ప్రజా సమస్యలను అధికారుల దృష్టికి తీసుకెళ్లడం ప్రజాప్రతినిధులు, గ్రామస్థుల బాధ్యత అని, అలాంటి ఫిర్యాదులపై ఉద్యోగులు సానుకూలంగా స్పందించాల్సిన అవసరం ఉందని వారు పేర్కొన్నారు. సమస్యలను పరిష్కరించాల్సిన ఉద్యోగి ఈ విధంగా వ్యవహరించారనే ఆరోపణలు రావడం పట్ల గ్రామాల్లో అసంతృప్తి వ్యక్తమవుతోంది.ఈ వ్యవహారంపై విద్యుత్ శాఖ ఉన్నతాధికారులు వెంటనే స్పందించి, గ్రామాల్లో నెలకొన్న విద్యుత్ సమస్యలను పరిష్కరించడంతో పాటు లైన్మెన్ వెంకటయ్య వ్యవహారంపై సమగ్ర విచారణ చేపట్టాలని గ్రామస్థులు డిమాండ్ చేస్తున్నారు. ఆరోపణలు నిజమని తేలితే శాఖాపరమైన చర్యలు తీసుకోవాలని కోరుతున్నారు.
