98 మంది లబ్ధిదారులకు చెక్కుల పంపిణీ

సూర్య, కాగజ్‌నగర్ : ఆడపిల్లల వివాహాలకు ఆర్థిక భరోసా కల్పించేందుకు ప్రభుత్వం అందిస్తున్న కళ్యాణలక్ష్మి, షాదీ ముబారక్ పథకాలను అర్హులైన లబ్ధిదారులు సద్వినియోగం చేసుకోవాలని సిర్పూర్ ఎమ్మెల్యే డాక్టర్ పాల్వాయి హరీష్ బాబు పిలుపునిచ్చారు. గురువారం కాగజ్‌నగర్ మున్సిపల్ కార్యాలయంలో నిర్వహించిన కార్యక్రమంలో కాగజ్‌నగర్ పట్టణం, మండలానికి చెందిన 82 మంది, సిర్పూర్ మండలానికి చెందిన 16 మంది కలిపి మొత్తం 98 మంది లబ్ధిదారులకు ఆయన చెక్కులు పంపిణీ చేశారు.ఈ సందర్భంగా ఎమ్మెల్యే మాట్లాడుతూ, ఆడపిల్లల వివాహాల సమయంలో పేద కుటుంబాలకు ఆర్థికంగా అండగా నిలిచేందుకు ప్రభుత్వం ఈ పథకాలను అమలు చేస్తోందన్నారు. ప్రభుత్వం అందిస్తున్న ఆర్థిక సాయాన్ని సద్వినియోగం చేసుకుని, వివాహ ఖర్చుల భారాన్ని తగ్గించుకోవాలని సూచించారు.ఈ కార్యక్రమంలో మున్సిపల్ చైర్‌పర్సన్ షాహిన్ సుల్తానా, మున్సిపల్ కమిషనర్ బట్టు తిరుపతి, తహసీల్దార్ మల్లెపూల మధుకర్, కౌన్సిలర్లు జ్యోతి, అల్లాడి రాజు, ముబీన్, సర్పంచులు రాచర్ల రజినీ మహేష్, చంకాపురి లావణ్య తదితరులు పాల్గొన్నారు.