కోల్‌కతా నుంచి యూరప్‌కు నేరుగా విమాన సర్వీసులు: పరిశీలిస్తామని కేంద్ర విమానయాన మంత్రి హామీ!
సూర్య జాతీయ డెస్క్: పశ్చిమ బెంగాల్ రాజధాని కోల్‌కతా నుంచి యూరప్ దేశాలకు నేరుగా (డైరెక్ట్) అంతర్జాతీయ విమాన సర్వీసులను పునరుద్ధరించే అంశాన్ని కేంద్ర ప్రభుత్వం సానుకూలంగా పరిశీలిస్తుందని కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు హామీ ఇచ్చారు. కోల్‌కతాలోని రాష్ట్ర సచివాలయం ‘నవాన్న’ వేదికగా జరిగిన ఉన్నత స్థాయి సమావేశంలో కేంద్ర మంత్రి పాల్గొన్నారు. ఈ సందర్భంగా రాష్ట్రంలో ప్రాంతీయ విమానయాన అనుసంధానాన్ని (ఉడాన్ పథకం) మరింత బలోపేతం చేసే దిశగా కేంద్ర పౌర విమానయాన మంత్రిత్వ శాఖ మరియు పశ్చిమ బెంగాల్ ప్రభుత్వం మధ్య నాలుగు కీలక అవగాహన ఒప్పందాలు (MoU) కుదిరాయి.
ఈ భేటీలో కోల్‌కతా నుంచి లండన్ మరియు ఇతర ప్రధాన యూరోపియన్ నగరాలకు నేరుగా విమాన సర్వీసులు నడపాలని, దుర్గాపూర్‌లోని అండాల్ విమానాశ్రయం నుంచి విమాన కార్యకలాపాలను మరింత విస్తరించాలని రాష్ట్ర ప్రభుత్వం కేంద్ర మంత్రికి విజ్ఞప్తి చేసింది. దీనికి కేంద్ర మంత్రి సానుకూలంగా స్పందిస్తూ.. తూర్పు భారతదేశానికి ప్రధాన ముఖద్వారమైన కోల్‌కతా నుంచి అంతర్జాతీయ కనెక్టివిటీని పెంచేందుకు విమానయాన సంస్థలతో చర్చిస్తామని భరోసా ఇచ్చారు. కోల్‌కతా సమీపంలోని కల్యాణి వద్ద నూతన గ్రీన్‌ఫీల్డ్ విమానాశ్రయం అభివృద్ధికి సుమారు 2,000 ఎకరాల భూమిని కేటాయించేందుకు రాష్ట్రం సంసిద్ధత వ్యక్తం చేయగా, కేంద్ర-రాష్ట్ర సమన్వయంతో విమానయాన మౌలిక వసతులను వేగవంతం చేస్తామని ఆయన స్పష్టం చేశారు.
అంతేకాకుండా, రాష్ట్రంలో పురూలియాలోని చర్రా, దక్షిణ దినాజ్‌పూర్‌లోని బాలుర్‌‌ఘాట్, అలీపుర్‌దువార్‌లోని హసిమారా మరియు పశ్చిమ మేదినీపూర్‌లోని కలైకుండ ఎయిర్‌స్ట్రిప్‌లను విమాన సర్వీసుల కోసం పునరుద్ధరించనున్నట్లు ఈ ఒప్పందాల సందర్భంగా వెల్లడించారు. వచ్చే రెండేళ్లలో బెంగాల్‌లో ఎనిమిది విమానాశ్రయాలను పూర్తిస్థాయిలో అందుబాటులోకి తీసుకురావడమే కేంద్ర ప్రభుత్వ లక్ష్యమని రామ్మోహన్ నాయుడు పేర్కొన్నారు. కోల్‌కతా నుంచి యూరప్‌కు నేరుగా విమానాలు ప్రారంభమైతే వ్యాపారం, ఐటీ, ఉన్నత విద్య మరియు పర్యాటక రంగాలకు సరికొత్త ఉత్తేజం లభించనుందని పరిశ్రమ వర్గాలు హర్షం వ్యక్తం చేస్తున్నాయి.
