టీవీఎస్ గ్రూప్‌లో వారసత్వ వివాదం: ఆస్తుల యాజమాన్యంపై వేణు శ్రీనివాసన్, మల్లికల మధ్య భిన్నాభిప్రాయాలు!
సూర్య బిజినెస్ & కార్పొరేట్ డెస్క్: ప్రముఖ భారతీయ ఆటోమొబైల్ దిగ్గజ సంస్థ టీవీఎస్ గ్రూప్ ప్రమోటర్ కుటుంబంలో ఆస్తుల పంపకం, వారసత్వ ప్రణాళికపై కీలక విభేదాలు తెరపైకి వచ్చాయి. గ్రూప్ చైర్మన్ ఎమెరిటస్ వేణు శ్రీనివాసన్, ఆయన సతీమణి, టాఫే అధినేత్రి మల్లికా శ్రీనివాసన్ మధ్య వ్యాపార ఆస్తుల యాజమాన్య హక్కుల విషయంలో భిన్నాభిప్రాయాలు వ్యక్తమవుతున్నట్లు విశ్వసనీయ నివేదికలు వెల్లడించాయి.
వ్యాపార నిర్వహణ బాధ్యతలను తర్వాతి తరానికి అప్పగించినంత మాత్రాన, కుటుంబ ఆస్తుల యాజమాన్య హక్కులు కూడా పూర్తిగా ఖరారైనట్లేనా అనే అంశంపైనే ప్రధానంగా వివాదం నెలకొన్నట్లు సమాచారం. కుమారుడు సుదర్శన్ వేణు, కుమార్తె లక్ష్మీ వేణులకు ఆస్తుల పంపిణీ సమగ్రంగా, సమాన న్యాయబద్ధంగా జరగాలని మల్లికా శ్రీనివాసన్ గట్టిగా భావిస్తుండగా.. గతంలో కుదిరిన ఒప్పందాలు, వేల్యూయేషన్ల ఆధారంగా ప్రక్రియ పూర్తయిందని వేణు శ్రీనివాసన్ వర్గం వాదిస్తోంది. వ్యాపారాల నిర్వహణ వేరని, కుటుంబ సంపదపై ఇద్దరు పిల్లలకూ సమాన హక్కులు ఉండాలనేది మల్లిక వర్గం ప్రధాన వాదనగా ఉంది.
దాదాపు 18 నెలలుగా ఈ వివాదం నడుస్తోందని, మధ్యవర్తిత్వ చర్చలు కూడా ఆశించిన ఫలితాన్ని ఇవ్వలేదని పరిశ్రమ వర్గాలు చెబుతున్నాయి. టీవీఎస్ మోటార్స్, సుందరం క్లేటన్ వంటి కీలక కంపెనీల భవిష్యత్తు నియంత్రణతో ముడిపడి ఉన్న ఈ పరిణామం ప్రస్తుతం దేశీయ కార్పొరేట్ వర్గాల్లో తీవ్ర ఆసక్తిని రేకెత్తిస్తోంది. కుటుంబంలో విభేదాలు మరింత ముదరకుండా సామరస్యపూర్వకంగా సమస్యను పరిష్కరించేందుకు చర్చలు కొనసాగుతున్నాయి.
