తెలుగు రాష్ట్రాల్లో వాయుగుండ ప్రభావం

హైదరాబాద్‌: తీవ్ర వాయుగుండం ప్రభావంతో తెలుగు రాష్ట్రాల్లో పలు ప్రాంతాల్లో వర్షాలు కొనసాగుతున్నాయి. వాయుగుండం తీరం దాటినప్పటికీ దాని ప్రభావంతో రానున్న 24 గంటల్లో అక్కడక్కడా ఓ మోస్తరు నుంచి భారీ వర్షాలు కురిసే అవకాశం ఉంది. తెలంగాణలో నిన్నటితో పోలిస్తే వర్షాల తీవ్రత కొంత తగ్గినప్పటికీ, పలు జిల్లాల్లో వర్షాలు కొనసాగే అవకాశం ఉందని వాతావరణ శాఖ తెలిపింది.

ప్రస్తుతం తీవ్ర వాయుగుండం ఛత్తీస్‌గఢ్‌, ఒడిశా వైపు కదులుతోంది. దీని ప్రభావంతో ఉత్తర, తూర్పు తెలంగాణ జిల్లాల్లో వర్షాలు కురిసే అవకాశం ఉంది. కొమురంభీం ఆసిఫాబాద్‌, మంచిర్యాల, జయశంకర్‌ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాలకు ఎల్లో అలర్ట్‌ జారీ చేశారు.

అదే సమయంలో తెలంగాణలో గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని అధికారులు హెచ్చరించారు. ప్రజలు అప్రమత్తంగా ఉండాలని, వర్షాల సమయంలో అవసరం లేకుండా బయటకు వెళ్లకుండా జాగ్రత్తలు తీసుకోవాలని సూచించారు.