సీజేపీ నేతల ముందస్తు అరెస్ట్.. నేడు ఎగ్జిక్యూటివ్ మేజిస్ట్రేట్ ఎదుట హాజరుపరచనున్న ఢిల్లీ పోలీసులు!

సూర్య జాతీయ & రాజకీయ డెస్క్: దేశ రాజధాని న్యూఢిల్లీలో తీవ్ర ఉద్రిక్తతలకు దారితీసిన నిరసనల నేపథ్యంలో, కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే, సహ-కన్వీనర్లు అశుతోష్ రాంకా, సౌరవ్ దాస్‌లను ఢిల్లీ పోలీసులు ముందస్తు అరెస్ట్ (ప్రివెంటివ్ అరెస్ట్) కింద అదుపులోకి తీసుకున్నారు. వారిని ఆదివారం ఉదయం ఢిల్లీ కంటోన్మెంట్ పోలీస్ స్టేషన్‌లో ఎగ్జిక్యూటివ్ మేజిస్ట్రేట్ ఎదుట అధికారికంగా హాజరుపరచనున్నారు.

ఓటర్ల జాబితా ప్రత్యేక సవరణ (SIR) ప్రక్రియలో అవకతవకలు జరిగాయని ఆరోపిస్తూ, కేంద్ర ఎన్నికల ప్రధాన కమిషనర్ (CEC) జ్ఞానేష్ కుమార్ రాజీనామా చేయాలని డిమాండ్ చేస్తూ జంతర్ మంతర్ వద్ద నిర్వహించ తలపెట్టిన నిరసన ప్రదర్శనకు పోలీసులు అనుమతి నిరాకరించిన సంగతి తెలిసిందే. ఈ క్రమంలో ముంబై నుంచి విమానంలో ఢిల్లీ విమానాశ్రయానికి చేరుకున్న వెంటనే వీరిని పోలీసులు విమానం లోపలే అదుపులోకి తీసుకున్నారు.

శాంతిభద్రతల పరిరక్షణ, ప్రజారవాణాకు ఆటంకం కలగకుండా ఉండేందుకే ఈ ముందస్తు చర్యలు చేపట్టినట్లు ఢిల్లీ పోలీసు వర్గాలు తెలిపాయి. మరోవైపు, తమ నాయకులను నిర్బంధించిన ప్రదేశాన్ని ముందుగా వెల్లడించలేదని, చట్టవిరుద్ధంగా వ్యవహరించారని సీజేపీ న్యాయ విభాగం ఆరోపించింది. ఈ అరెస్టులతో పాటు ఢిల్లీ వ్యాప్తంగా భారీ బందోబస్తు కొనసాగుతుండటంతో జంతర్ మంతర్ పరిసర ప్రాంతాల్లో గట్టి నిఘా ఏర్పాటు చేశారు.