నేడు చెన్నైలో ప్రధాని మోదీ పర్యటన:

సూర్య జాతీయ & అభివృద్ధి డెస్క్: ప్రధానమంత్రి నరేంద్ర మోదీ ఆదివారం తమిళనాడు రాజధాని చెన్నైలో విస్తృతంగా పర్యటించనున్నారు. ఈ పర్యటనలో భాగంగా సుమారు రూ.13,000 కోట్ల విలువైన పలు కీలక మౌలిక వసతులు, అభివృద్ధి ప్రాజెక్టులకు శంకుస్థాపనలు, ప్రారంభోత్సవాలు చేయనున్నారు. ముఖ్యంగా చెన్నై వాసులకు ట్రాఫిక్ కష్టాల నుంచి భారీ ఊరటనిచ్చేలా చెన్నై మెట్రో ఫేజ్-2 పరిధిలోని ప్రతిష్టాత్మక 'పూనమల్లి బైపాస్ - వడపళని' మార్గాన్ని ప్రధాని మోదీ లాంఛనంగా ప్రారంభించనున్నారు.

సుమారు 15 కిలోమీటర్ల పొడవునా 11 ఎలివేటెడ్ స్టేషన్లతో నిర్మించిన ఈ పూనమల్లి-వడపళని స్ట్రెచ్ అందుబాటులోకి రావడంతో చెన్నై పశ్చిమ శివారు ప్రాంతాల నుంచి నగర కేంద్రానికి ప్రయాణ సమయం గణనీయంగా తగ్గనుంది. ఈ ప్రారంభోత్సవంలో భాగంగా పోరూర్ బైపాస్ నుంచి పూనమల్లి బైపాస్ వరకు ప్రధాని స్వయంగా మెట్రో రైలులో ప్రయాణించనున్నారు.

ఈ మెట్రో మార్గంతో పాటు దాదాపు రూ.3,700 కోట్ల విలువైన జాతీయ రహదారుల ప్రాజెక్టులు, చెన్నై పోర్ట్, కామరాజర్ పోర్ట్, వి.ఒ. చిదంబరనార్ పోర్టుల్లో నూతన అభివృద్ధి పనులు, అమృత్ భారత్ స్టేషన్ స్కీమ్ కింద పునరుద్ధరించిన 5 రైల్వే స్టేషన్లను ప్రధాని జాతికి అంకితం చేయనున్నారు. అనంతరం ఐఐటీ మద్రాస్‌లో అత్యాధునిక ‘సుధా గోపాలకృష్ణన్ బ్రెయిన్ సెంటర్’ను ప్రారంభించి, జైగోపాల్ గరోడియా హిందూ విద్యాలయ స్వర్ణోత్సవాల్లో పాల్గొననున్నారు. ప్రధాని పర్యటన నేపథ్యంలో చెన్నై నగరవ్యాప్తంగా కట్టుదిట్టమైన భద్రతా ఏర్పాట్లు చేశారు.