ఫ్లైదుబాయ్ విమాన ఘటనపై యూఏఈ ఉన్నత స్థాయి దరఖాస్తు

సూర్య అంతర్జాతీయ డెస్క్: దుబాయ్ నుంచి ఇజ్రాయెల్‌కు బయలుదేరిన ఫ్లైదుబాయ్ విమానం FZ1073 ప్రయాణంలో చోటుచేసుకున్న తీవ్ర ఉద్రిక్తత మరియు దారి మళ్లింపు ఘటనపై యునైటెడ్ అరబ్ ఎమిరేట్స్ అటార్నీ జనరల్ ప్రత్యేక దర్యాప్తునకు ఆదేశించారు. ప్రయాణ సమయంలో విమానంలో తలెత్తిన పరిణామాలు, వాటి వెనుక అసలు నిజాలు ఏమిటనే దానిపై సమగ్ర విచారణ చేపట్టడానికి ప్రత్యేక దర్యాప్తు బృందాన్ని రంగంలోకి దించారు. ఈ ఘటనకు ఏదైనా ఉగ్రవాద కార్యకలాపాలతో సంబంధం ఉందా లేదా దీని వెనుక ముందుస్తు పన్నాగం ఏదైనా ఉందా అనే కోణంలో అధికారులు లోతుగా పరిశోధనలు జరుపుతున్నారు.

ఈ విమానం యూఏఈ దేశంలో రిజిస్టర్ అయి ఉండటంతో పాటు అక్కడి జెండాతో నడుస్తున్న కారణంగా, దేశంలోని ప్రస్తుత చట్టాల ప్రకారం ఈ నేరంపై విచారణ జరిపే పూర్తి అధికారిక పరిధి యూఏఈ న్యాయ అధికారులకు ఉంటుందని ఎమిరేట్స్ న్యూస్ ఏజెన్సీ వెల్లడించింది. విమానం గగనతలంలో విదేశీ ప్రాంతాలపై ప్రయాణిస్తున్నప్పటికీ, యూఏఈ రిజిస్టర్డ్ విమానంలో జరిగే నేరాలపై అక్కడి చట్టాలే వర్తిస్తాయని స్పష్టం చేశారు. కాగా, ఈ విమాన ప్రయాణ సమయంలో కాక్‌పిట్‌లో జరిగిన ఘర్షణను గుర్తించి సిబ్బంది వెంటనే అప్రమత్తమై విమానాన్ని సురక్షితంగా సౌదీ అరేబియాలోని తబుక్ విమానాశ్రయంలో ల్యాండ్ చేసినట్లు ఫ్లైదుబాయ్ సంస్థ ఇప్పటికే ఒక అధికారిక ప్రకటనలో వెల్లడించిన విషయం తెలిసిందే.

ఇదిలా ఉండగా, తీవ్ర గాయాలపాలైనప్పటికీ ప్రాణాలను పణంగా పెట్టి విమానాన్ని కాపాడిన భారతీయ కెప్టెన్ స్మిత్ మచ్ఛర్ సాహసాన్ని దౌత్యవర్గాలు అభినందించాయి. కాక్‌పిట్ తలుపు తెరిచి ప్రయాణికులు మరియు సిబ్బంది దాడికి పాల్పడిన నిందితుడిని అణచివేయడానికి సహాయపడిన ఆయన ధైర్యసాహసాలు పెద్ద ప్రమాదాన్ని నివారించాయని అధికారులు ప్రశంసించారు. యూఏఈలోని భారత రాయబారి దీపక్ మిట్టల్ మరియు దుబాయ్ కాన్సుల్ జనరల్ డాక్టర్ ఇ. విష్ణువర్ధన్ రెడ్డి తదితరులు కెప్టెన్ స్మిత్ మచ్ఛర్ కుటుంబాన్ని కలిసి ఆయన ఆరోగ్య పరిస్థితిని విచారించి, ఎంబసీ తరఫున పూర్తి అండదండలు ఉంటాయని భరోసా ఇచ్చారు. ఈ దర్యాప్తు పూర్తయ్యే వరకు ఇజ్రాయెల్‌కు నడిచే విమాన సర్వీసులను తాత్కాలికంగా నిలిపివేస్తున్నట్లు ఫ్లైదుబాయ్ యాజమాన్యం ప్రకటించింది.