బ్రిక్స్ వర్సెస్ ఐరాస కాదు.. ఐక్యరాజ్యసమితికి బ్రిక్స్ ఎల్లప్పుడూ మద్దతుగానే ఉంటుంది: విదేశాంగ మంత్రి జైశంకర్
సూర్య అంతర్జాతీయ డెస్క్: బ్రిక్స్ వంటి అంతర్జాతీయ కూటముల ఆవిర్భావం ఐక్యరాజ్యసమితికి ప్రత్యామ్నాయం కాదని, బ్రిక్స్ ఎల్లప్పుడూ ఐరాసకు మరియు అందులోని సంస్థాగత సంస్కరణలకు సంపూర్ణ మద్దతుగానే నిలుస్తుందని భారత విదేశాంగ శాఖ మంత్రి ఎస్. జైశంకర్ స్పష్టం చేశారు. న్యూయార్క్లో అబ్జర్వర్ రీసెర్చ్ ఫౌండేషన్ (ఓఆర్ఎఫ్) నిర్వహించిన ఇంటరాక్టివ్ చర్చా వేదికలో ఆయన మాట్లాడారు. ఐరాస లేదా బ్రిక్స్ అనే రెండింటి మధ్య ఏదో ఒకదాన్ని ఎంచుకోవాలనే ప్రతిపాదన పూర్తిగా అవాస్తవమని, అంతర్జాతీయ వ్యవస్థలో ఐరాస ప్రాధాన్యతను బ్రిక్స్ దేశాలు నిరంతరం పునరుద్ఘాటిస్తూనే వస్తున్నాయని ఆయన తేల్చిచెప్పారు.
ఐక్యరాజ్యసమితిలో కొన్ని లోపాలు ఉన్నప్పటికీ, అంతర్జాతీయ వ్యవస్థలో అది పోషించిన మరియు పోషిస్తున్న పాత్ర అత్యంత కీలకమైనదని విదేశాంగ మంత్రి పేర్కొన్నారు. లోపాలు ఉన్నాయని మొత్తం వ్యవస్థనే కొట్టిపారేయడం సరైంది కాదని, ఒకవేళ నేడు ఐరాస లేకపోతే ప్రపంచమంతా కలిసి అలాంటి మరో వ్యవస్థను సృష్టించాల్సి వచ్చేదని ఆయన వ్యాఖ్యానించారు. బ్రిక్స్ కూటమిలో ఉన్న సభ్యదేశాలు సమకాలీన ప్రపంచ వాస్తవాలకు అనుగుణంగా ఐరాసను, ముఖ్యంగా భద్రతా మండలిని సంస్కరించాలని బలంగా కోరుకుంటున్నాయని, ఆ విధంగా ఐరాసను మరింత బలోపేతం చేయడానికే బ్రిక్స్ కృషి చేస్తోందని జైశంకర్ వివరించారు.
బహుళపాక్షిక వేదికలు ఉన్నప్పటికీ పలు ప్రపంచ దేశాలు బ్రిక్స్లో చేరేందుకు ఎందుకు ఆసక్తి చూపుతున్నాయన్న ప్రశ్నకు జైశంకర్ సమాధానమిస్తూ.. బ్రిక్స్ పాశ్చాత్యేతర దేశాల గళానికి, భిన్నమైన ఆలోచనలకు ప్రాతినిధ్యం వహించే బలమైన వేదికగా నిలుస్తోందని వెల్లడించారు. గ్లోబల్ డిబేట్లో పాశ్చాత్యేతర దేశాల భాగస్వామ్యం, వాటి అభిప్రాయాలు పెరుగుతున్నందునే బ్రిక్స్ ప్రాధాన్యత అంతకంతకూ విస్తరిస్తోందని పేర్కొన్నారు. ఇటీవల బ్రిక్స్ విస్తరణ సమయంలో సభ్యత్వం రెట్టింపు అయిందని, కావాలనుకుంటే నాలుగు నుంచి ఐదు రెట్లు పెరిగేంత డిమాండ్ కనిపించిందని తెలిపారు. ప్రపంచంలో విశ్వసనీయత అనేది సంపాదించుకునే అంశమని, చిన్న దేశమైనా న్యాయంగా వ్యవహరిస్తే అంతర్జాతీయ సమాజంలో నమ్మకం పొందుతుందని ఆయన స్పష్టం చేశారు.
