ఇజ్రాయెల్ డిజిటల్ అడ్వర్టైజింగ్ సంస్థ డిస్కవర్-టెక్ సంచలన దందా బయటపెట్టిన పరిశోధకులు
సూర్య అంతర్జాతీయ డెస్క్: ఇంటర్నెట్ ప్రపంచంలో ఆన్‌లైన్ ప్రకటనల వెనుక దాగి ఉన్న ఒక అత్యంత ప్రమాదకరమైన భారీ గూఢచర్య నెట్‌వర్క్ గుట్టురట్టయింది. ఇజ్రాయెల్‌కు చెందిన డిజిటల్ అడ్వర్టైజింగ్ ఏజెన్సీ డిస్కవర్-టెక్ ఆన్‌లైన్ ప్రకటనల వ్యవస్థను వేదికగా చేసుకుని ప్రపంచవ్యాప్తంగా వేలమంది ఇంటర్నెట్ వినియోగదారులపై నిఘా పెట్టినట్లు పరిశోధకులు వెల్లడించారు. సైబర్ సెక్యూరిటీ పరిశోధన సంస్థ సిటిజన్ ల్యాబ్ మరియు అడ్వర్టైజింగ్ సెక్యూరిటీ సంస్థ కాన్ఫియంట్ సంయుక్తంగా నిర్వహించిన పరిశోధనల్లో ఈ సంచలన విషయాలు వెలుగులోకి వచ్చాయి. డిజిటల్ ప్రకటనలలో మాల్వేర్‌ను చొప్పించి వినియోగదారుల పరికరాల్లోకి చేరుకోవడం ద్వారా ఈ సంస్థ అత్యంత సున్నితమైన సమాచారాన్ని సేకరిస్తోందని నివేదిక స్పష్టం చేసింది.
ఈ విస్తృత నిఘా ప్రక్రియలో ప్రధానంగా పాత్రికేయులు, ఐక్యరాజ్యసమితి అధికారులు, నాటో ప్రతినిధులు, వివిధ దేశాల ప్రభుత్వాల ముఖ్య విభాగాల ఉద్యోగులతో పాటు ప్రముఖ అంతర్జాతీయ వార్తా సంస్థలకు చెందిన విలేకరులను లక్ష్యంగా చేసుకున్నట్లు సిటిజన్ ల్యాబ్ నివేదిక పేర్కొంది. అల్ జజీరా సంస్థకు చెందిన జర్నలిస్టులతో పాటు ప్రాన్స్, ఇటలీ, ఆస్ట్రేలియా, మెక్సికో దేశాలకు చెందిన సుమారు 18 ప్రముఖ మీడియా సంస్థల విలేకరులపై ఈ గూఢచర్యం సాగినట్లు స్పష్టమవుతోంది. అదేవిధంగా అమెరికా రక్షణ శాఖ కార్యాలయం పెంటగాన్, అంతర్జాతీయ అణుశక్తి ఏజెన్సీ, అంతర్జాతీయ నేరాల న్యాయస్థానం వంటి అంతర్జాతీయ సంస్థల నెట్‌వర్క్‌లలోకి కూడా ఈ ప్రకటనలు చొరబడినట్లు కాన్ఫియంట్ సంస్థ గుర్తించింది.
ఈ వ్యవహారం వెలుగులోకి రావడంతో ప్రపంచవ్యాప్తంగా ఉన్న దిగ్గజ టెక్నాలజీ డిజిటల్ సంస్థలు తక్షణమే కఠిన చర్యలు చేపట్టాయి. గూగుల్ సంస్థ డిస్కవర్-టెక్‌తో ఉన్న అన్ని రకాల వ్యాపార భాగస్వామ్య ఒప్పందాలను తక్షణమే రద్దు చేసుకుంది మరియు తమ క్రోమ్ సేఫ్ బ్రౌజింగ్ సేవల్లో యూజర్లకు హెచ్చరికలు జారీ చేసింది. అలాగే ఐఏబీ యూరప్ సంస్థ డిస్కవర్-టెక్ సభ్యత్వాన్ని నిలిపివేయగా, కామ్‌కాస్ట్ కింద పనిచేసే అడ్వర్టైజింగ్ ప్లాట్‌ఫామ్‌లు కూడా ఈ ఇజ్రాయెల్ సంస్థను తమ నెట్‌వర్క్ నుంచి శాశ్వతంగా తొలగించాయి. ఆన్‌లైన్ ప్రకటనల రంగాన్ని దుర్వినియోగం చేస్తూ సాగిస్తున్న ఇటువంటి నిఘా కార్యకలాపాలు అంతర్జాతీయ భద్రతకు పెద్ద సవాలుగా మారాయని సైబర్ రక్షణ నిపుణులు తీవ్ర ఆందోళన వ్యక్తం చేస్తున్నారు.
