గీతంలో దసరా సంబరాలు... *సరస్వతి పూజ, బొమ్మల కొలువు, దాండియా సందడి*

విశాఖ ఎడ్యుకేషన్, సూర్య : దసరా నవరాత్రుల సందర్భంగా గీతం డీమ్డ్ విశ్వవిద్యాలయంలోని  వివిధ విభాగాలలో దసరా సంబరాలు అంబరాన్ని తాకాయి. విద్యార్ధులు దాండియా ఆట పాటలతో విశ్వవిద్యాలయం ప్రాంగణాన్ని ఉత్సాహంగా మారుస్తూ సందడి చేయగా గీతం  అడ్మిషన్ విభాగం బోధనేతర సిబ్బంది ఆధ్వర్యంలో  శుక్రవారం   సరస్వతి పూజను నిర్వహించారు. దసరా బొమ్మలు కొలువు, రంగోలిలతో ఉద్యోగులు పండగ శోభను తీసుకువచ్చారు. మరోపక్క గీతం స్కూల్ ఆఫ్ సైన్స్ ఆవరణలో సరస్వతి పూజను విద్యార్ధులు, అధ్యాపకులు వైభవంగా నిర్వహించారు. అదే విధంగా పుస్తకాలకు నెలవైన విశ్వవిద్యాలయం గ్రంధాలయం (నాలెడ్జి రీసోర్స్ సెంటర్)లో గ్రంధాలకు సరస్వతి పూజా కార్యక్రమాలను నిర్వహించారు. వీటితో పాటు కంప్యూటర్ సైన్స్ ఇంజనీరింగ్, బయోటెక్నాలజి తదితర విభాగాలలో సహితం పూజా కార్యక్రమాలను ఏర్పాటు చేశారు. గీతం వైద్య కళాశాల, ఆసుపత్రి ఆవరణలోని  శ్రీరాజరాజేశ్వరి అమ్మవారి దేవాలయంలో సరస్వతి పూజా కార్యక్రమాలను ఘనంగా నిర్వహించారు.

రిపోర్టర్ : సత్యనారాయణ, ఏయూ, విశాఖపట్నం.