అంతర్జాతీయ విమానయాన సంస్థలకు హౌతీల తీవ్ర హెచ్చరిక
: సౌదీ గగనతలంలో కార్యకలాపాలు నిలిపివేయాలని అల్టిమేటం
సూర్య అంతర్జాతీయ డెస్క్: పశ్చిమాసియాలో ఉద్రిక్తతలు నానాటికీ తీవ్రరూపం దాల్చుతున్న వేళ, యెమెన్‌కు చెందిన హౌతీ తిరుగుబాటుదారులు అంతర్జాతీయ విమానయాన సంస్థలకు బహిరంగ హెచ్చరికలు జారీ చేశారు. సౌదీ అరేబియా గగనతలం మీదుగా లేదా సౌదీ విమానాశ్రయాల నుంచి విమాన కార్యకలాపాలు నిర్వహించే విమానయాన సంస్థలు తమ నిర్ణయాలను తక్షణమే పునఃసమీక్షించుకోవాలని, లేనిపక్షంలో ఎదురయ్యే పరిణామాలకు వారే పూర్తి బాధ్యత వహించాల్సి ఉంటుందని హెచ్చరించారు. ఈ మేరకు హౌతీల అధీనంలోని పౌర విమానయాన విభాగం ఒక అధికారిక ప్రకటన విడుదల చేస్తూ పలు విదేశీ విమానయాన సంస్థలకు నోటీసులు పంపినట్లు అంతర్జాతీయ మీడియా పేర్కొంది.
సౌదీ అరేబియా ఆధ్వర్యంలోని సంకీర్ణ దళాలు తమపై చేపడుతున్న సైనిక చర్యలు, యెమెన్‌లోని విమానాశ్రయాలు మరియు ఓడరేవులపై కొనసాగుతున్న ఆంక్షలకు ప్రతిస్పందనగానే ఈ హెచ్చరికలు చేసినట్లు హౌతీ వర్గాలు తెలిపాయి. సౌదీ పరిధిలోని సైనిక, వ్యూహాత్మక ప్రాంతాలతో పాటు పౌర విమానాశ్రయాలు సైతం భవిష్యత్‌లో తమ దాడుల పరిధిలోకి వచ్చే ప్రమాదం ఉందని వారు పరోక్షంగా హెచ్చరించారు. డ్రోన్లు, బాలిస్టిక్ క్షిపణులతో సౌదీ మౌలిక వసతులపై గతంలో దాడులు చేసిన అనుభవం ఉన్న హౌతీల నుంచి తాజా హెచ్చరికలు వెలువడటంతో అంతర్జాతీయ ఏవియేషన్ రంగంలో తీవ్ర ఆందోళన వ్యక్తమవుతోంది.
ఎర్ర సముద్రంలో వాణిజ్య నౌకలపై దాడులతో ఇప్పటికే అంతర్జాతీయ సముద్ర రవాణాను స్తంభింపజేసిన హౌతీలు, ఇప్పుడు విమానయాన మార్గాలను కూడా లక్ష్యంగా చేసుకోవడం గ్లోబల్ ట్రావెల్ మరియు కార్గో రవాణాపై తీవ్ర ప్రభావం చూపే అవకాశం ఉందని భద్రతా నిపుణులు హెచ్చరిస్తున్నారు. ప్రయాణికులు, సిబ్బంది భద్రత దృష్ట్యా పలు గ్లోబల్ ఎయిర్‌లైన్స్ ప్రత్యామ్నాయ సురక్షిత మార్గాలను అన్వేషించాల్సిన పరిస్థితి ఏర్పడుతోంది. ఈ తాజా పరిణామాలపై సౌదీ అరేబియా అధికార వర్గాలు ఇంకా పూర్తిస్థాయి అధికారిక ప్రకటన చేయనప్పటికీ, సరిహద్దు గగనతల రక్షణ వ్యవస్థలను మరింత అప్రమత్తం చేసినట్లు సమాచారం.
