ఏఐ టెక్నాలజీతో పరీక్షలో చీటింగ్: దక్షిణ కొరియా టాప్ స్కోరర్ సంచలన అంగీకారం

సూర్య అంతర్జాతీయ డెస్క్: దక్షిణ కొరియాలో జరిగిన ప్రతిష్టాత్మక జాతీయ పన్ను అకౌంటెంట్ అర్హత పరీక్షలో (Tax Accountant Qualification Exam) ఊహించని రీతిలో అగ్రస్థానం సాధించి సంచలనం సృష్టించిన అభ్యర్థి, తాను ఆర్టిఫిషియల్ ఇంటెలిజెన్స్ (ఏఐ) సాయంతో కాపీ కొట్టానని ఎట్టకేలకు అంగీకరించాడు. ఈ ఏడాది జరిగిన 63వ పన్ను అకౌంటెంట్ పరీక్ష మొదటి దశలో 160 ప్రశ్నలకు గాను ఏకంగా 159 ప్రశ్నలకు సరైన సమాధానాలు రాసి 400 మార్కులకు 397.5 మార్కులు సాధించడంతో అతని ప్రతిభపై ఆన్‌లైన్‌లో తీవ్ర అనుమానాలు వ్యక్తమయ్యాయి. సగటు మార్కులు కేవలం 30.18గా ఉన్న పన్ను చట్టాల విభాగంలోనూ వందకు వంద మార్కులు సాధించడంతో ఇదంతా ఏఐ మాయాజాలమనే విమర్శలు వెల్లువెత్తాయి. తొలుత తనపై వచ్చిన ఆరోపణలను ఖండించిన హన్ వోన్-సియోక్ అనే ఆ అభ్యర్థి, చివరకు తన న్యాయవాది యూట్యూబ్ ఛానెల్ ద్వారా ప్రజలకు క్షమాపణలు చెబుతూ నిజాన్ని బయటపెట్టాడు.

రహస్య మైక్రో కెమెరా ద్వారా ప్రశ్నపత్రాన్ని ఫోటో తీసి, దానిని జనరేటివ్ ఏఐకి పంపి, స్మార్ట్‌ఫోన్ ద్వారా సమాధానాలు పొందినట్లు ఆ అభ్యర్థి పోలీసుల ఎదుట లొంగిపోయి వాంగ్మూలం ఇచ్చాడు. మొదటి దశతో పాటు వ్యాసరూప ప్రశ్నలతో కూడిన రెండో దశ రాత పరీక్షలోనూ ఇదే తరహాలో సాంకేతికతను ఉపయోగించి 800 మార్కులకు 663 మార్కులు సాధించి టాపర్‌గా నిలిచాడని తేలింది. పరీక్షా కేంద్రంలో ఇన్విజిలేటర్లు ఉన్నప్పటికీ, స్మార్ట్ పరికరాలను గుర్తించడంలో విఫలమవడం గమనార్హం. మంచి ఉద్యోగం వదిలేసి వ్యాపారం ప్రారంభించి ఆర్థికంగా నష్టపోవడం వల్లే, తల్లిదండ్రులను నిరాశపరచకూడదనే ఉద్దేశంతో ఈ తప్పుడు మార్గాన్ని ఎంచుకున్నట్లు అతను ఆవేదన వ్యక్తం చేశాడు.

ఈ ఘటనతో దక్షిణ కొరియా విద్యా మరియు పరీక్షా నిర్వహణ విభాగాలు ఒక్కసారిగా అప్రమత్తమయ్యాయి. ఇటీవలి కాలంలో స్మార్ట్ గ్లాసెస్ మరియు ఏఐ పరికరాల ద్వారా పరీక్షల్లో అక్రమాలకు పాల్పడుతున్న ఘటనలు పెరుగుతుండటంతో ప్రభుత్వం కఠిన చర్యలకు ఉపక్రమించింది. ఇలాంటి అక్రమాలకు పాల్పడే అభ్యర్థులపై క్రిమినల్ కేసులు నమోదు చేయడంతో పాటు, పరీక్షలు రాయకుండా విధించే నిషేధ కాలాన్ని ఒక ఏడాది నుండి మూడేళ్లకు పెంచుతూ అధికారులు నిర్ణయం తీసుకున్నారు. తాజా ఉదంతంపై సియోల్ మెట్రోపాలిటన్ పోలీస్ ఏజెన్సీ ప్రత్యేక దర్యాప్తు చేపట్టి, నిందితుడికి సహకరించిన సాంకేతిక అంశాలపై లోతుగా విచారణ జరుపుతోంది.