జిబౌటి తీరంలో ఘోర పడవ ప్రమాదం: 109 మంది మృతి, 116 మంది గల్లంతు!
సూర్య అంతర్జాతీయ డెస్క్: ఆఫ్రికా దేశమైన జిబౌటి తీరంలో పెను విషాదం చోటుచేసుకుంది. సుమారు 350 మంది వలసదారులతో ప్రయాణిస్తున్న పడవ సముద్రంలో మునిగిపోవడంతో కనీసం 109 మంది జలసమాధి అయ్యారని అంతర్జాతీయ వలసల సంస్థ (IOM) వెల్లడించింది. మరో 116 మంది ఆచూకీ గల్లంతవడంతో వారి కోసం సహాయక బృందాలు ముమ్మరంగా గాలింపు చర్యలు చేపడుతున్నాయి.
ఐఓఎం తెలిపిన వివరాల ప్రకారం.. అక్టోబర్ 8-9 రాత్రి సమయంలో జిబౌటి నుంచి యెమెన్ వైపు ఈ పడవ బయలుదేరింది. పరిమితికి మించి ప్రయాణికులను ఎక్కించడంతో సముద్రపు అలల తాకిడికి తట్టుకోలేక బోటు ఒక్కసారిగా బోల్తా పడి మునిగిపోయింది. ప్రాణాలు కోల్పోయిన వారిలో మహిళలు, చిన్నారులు కూడా ఉన్నట్లు సమాచారం.
ఆర్థిక అవకాశాలు, ఉపాధి కోసం ఇతర దేశాలకు వలస వెళ్లే క్రమంలో ప్రజలు ఎదుర్కొంటున్న ప్రాణాంతక పరిస్థితులకు ఈ ఘోర విషాదం తీవ్ర నిదర్శనమని ఐఓఎం ఆవేదన వ్యక్తం చేసింది. ఆఫ్రికా హార్న్ ప్రాంతం నుంచి గల్ఫ్ దేశాలకు చేరుకోవడానికి మానవ అక్రమ రవాణాదారులను నమ్మి ప్రమాదకర సముద్ర మార్గాల్లో ప్రయాణిస్తూ వలసదారులు తరచూ ఇలాంటి ప్రమాదాల బారిన పడుతున్నారు. ఈ ఘటనపై తీవ్ర దిగ్భ్రాంతి వ్యక్తం చేసిన అంతర్జాతీయ సంస్థలు వలసదారుల అక్రమ రవాణాను అరికట్టాలని పిలుపునిచ్చాయి.
