'నాకు పెళ్లి వయసొచ్చింది' పాట పాడిన సంగీత దర్శకుడు అనిరుధ్!
ప్రముఖ సంగీత దర్శకుడు అనిరుధ్ రవిచందర్, సన్‌రైజర్స్ హైదరాబాద్ యజమాని కావ్య మారన్‌ల వివాహం గురించి సోషల్ మీడియాలో జోరుగా ప్రచారం సాగుతున్న సంగతి తెలిసిందే. ఈ వివాహ వార్తల మధ్య అనిరుధ్ ఒక వేదికపై సరదాగా పాడిన పాట నెట్టింట వైరల్‌గా మారింది.
ఒక లైవ్ ఈవెంట్‌లో పాల్గొన్న సమయంలో ప్రేక్షకులు 'కావ్య.. కావ్య..' అంటూ పెద్ద ఎత్తున నినాదాలు చేశారు. వారి నినాదాలకు అనిరుధ్ స్పందిస్తూ, తను స్వరపరిచిన హిట్ సాంగ్ 'ఎనక్కు ఇప్ప కళ్యాణ వయసు దాన్ వందుడుచు డి' (నాకు ఇప్పుడు పెళ్లి వయసొచ్చింది) అని సరదాగా పాడారు.
అనిరుధ్ ఈ పాట పాడటంతో అక్కడ ఉన్న వారంతా కేరింతలు కొట్టారు. అభిమానులు ఈ సన్నివేశాన్ని వీడియో తీసి సోషల్ మీడియాలో పోస్ట్ చేయడంతో ఈ వీడియో ఇప్పుడు తెగ వైరల్ అవుతోంది.
గత కొన్ని రోజులుగా అనిరుధ్, కావ్య మారన్ ల వివాహం గురించి వార్తలు వస్తున్నప్పటికీ, వీరి వివాహ తేదీ లేదా వేదికపై ఇరు కుటుంబాల నుంచి ఎలాంటి అధికారిక ప్రకటన వెలువడలేదు. అయినప్పటికీ అనిరుధ్ సమయానుకూలంగా చేసిన ఈ సరదా వ్యాఖ్య అభిమానులను విశేషంగా ఆకట్టుకుంటోంది.
