మైత్రి మూవీ మేకర్స్ '418' మూవీ రిలీజ్ డేట్ ఫిక్స్.. దసరా బరిలో ఇంటెన్స్ హారర్ థ్రిల్లర్!
సూర్య ఎంటర్‌టైన్‌మెంట్ డెస్క్: ప్రముఖ నిర్మాణ సంస్థ మైత్రీ మూవీ మేకర్స్ తొలిసారిగా అత్యంత భిన్నమైన డార్కర్ జానర్‌లోకి అడుగుపెడుతూ తెరకెక్కించిన సంచలన చిత్రం '418'. టాలీవుడ్ స్టార్ డైరెక్టర్ ప్రశాంత్ నీల్ సమర్పిస్తున్న ఈ ఇంటెన్స్ హారర్ థ్రిల్లర్ సినిమా విడుదలకు సంబంధించి మేకర్స్ అధికారికంగా స్పష్టతనిచ్చారు. ఇప్పటికే సినిమాపై భారీ అంచనాలు నెలకొనగా, దసరా పండుగ కానుకగా అక్టోబర్ 23వ తేదీన ఈ చిత్రాన్ని తెలుగుతో పాటు తమిళ, కన్నడ, మలయాళ, హిందీ భాషల్లో పాన్ ఇండియా స్థాయిలో గ్రాండ్‌గా విడుదల చేయనున్నట్లు చిత్ర యూనిట్ ప్రకటించింది.
దర్శకత్వ ప్రతిభతో పాటు విభిన్న కథాంశాలను ఎంచుకోవడంలో పేరుగాంచిన ప్రశాంత్ నీల్ సమర్పణలో వస్తున్న ఈ చిత్రంతో కీర్తన్ నాదగౌడ దర్శకుడిగా పరిచయం అవుతున్నారు. ఈ సినిమాకు సంబంధించిన కథను కూడా ఆయనే స్వయంగా అందించడం విశేషం. టాలీవుడ్ అగ్ర నిర్మాతలు నవీన్ యెర్నేని, యలమంచిలి రవిశంకర్ ఈ చిత్రాన్ని అత్యున్నత నిర్మాణ విలువలతో నిర్మిస్తున్నారు. సినిమాలో చైత్ర ఆచార్, సూర్య రాజ్, చరణ్ లక్కరాజు, ప్రీతి పగడాల, శశాంక్ పాటిల్ తదితరులు అత్యంత కీలకమైన పాత్రలలో నటిస్తూ ప్రేక్షకులను భయపెట్టడానికి సిద్ధమవుతున్నారు.
సాధారణ హారర్ సినిమాలకు భിన్నంగా ఎక్కడా కామెడీ జోలికి వెళ్లకుండా అత్యంత సీరియస్, అన్‌సెటిలింగ్ నెరేటివ్‌తో ఈ చిత్రాన్ని తెరకెక్కించినట్లు మేకర్స్ తెలిపారు. ఇప్పటికే విడుదలైన ఈ సినిమా ట్రైలర్ ప్రేక్షకులలో అంచనాలను తారాస్థాయికి చేర్చింది. స్టన్నింగ్ విజువల్స్, వెన్నులో వణుకు పుట్టించే బ్యాక్‌గ్రౌండ్ స్కోర్, సరికొత్త సూపర్‌నేచురల్ థ్రిల్స్‌‌తో ఈ చిత్రం ప్రేక్షకులకు ఒక గ్రిప్పింగ్ హారర్ థియేట్రికల్ అనుభూతిని పంచనుందని సినీ విశ్లేషకులు భావిస్తున్నారు.
అక్టోబర్ 23న దసరా సీజన్‌లో విడుదలవుతున్న ఈ చిత్రం ద్వారా బాక్సాఫీస్ వద్ద సరికొత్త రికార్డులు సృష్టించాలని మైత్రీ మూవీ మేకర్స్ ప్లాన్ చేస్తోంది. వైవిధ్యమైన కథాకథనాలతో రూపొందిన ఈ హారర్ థ్రిల్లర్ ప్రేక్షకులను ఏ మేరకు భయపెట్టి మెప్పిస్తుందనేది త్వరలోనే వెల్లడికానుంది. చిత్రానికి సంబంధించిన మరిన్ని ప్రచార కార్యక్రమాలను మేకర్స్ త్వరలో వేగవంతం చేయనున్నారు.
