ఆకట్టుకునే టీజర్‌తో వస్తున్న 'మెట్రో లవర్'.. సినిమా కచ్చితంగా పెద్ద విజయం సాధిస్తుంది: డైరెక్టర్ త్రినాథరావు నక్కిన

సూర్య ఎంటర్‌టైన్‌మెంట్ డెస్క్: నరేన్ వనపర్తి, సాహితీ అవంచ ప్రధాన పాత్రల్లో నటిస్తున్న తాజా రొమాంటిక్ అండ్ కాన్సెప్ట్ ఓరియెంటెడ్ చిత్రం 'మెట్రో లవర్'. మహేష్ నాంపెల్లి దర్శకత్వంలో తెరకెక్కుతున్న ఈ సినిమాకు స్టార్ మ్యూజిక్ డైరెక్టర్ భీమ్స్ సిసిరోలియో సంగీతం అందిస్తున్నారు. కెఎంసి ప్రొడక్షన్స్ మరియు ఈగిల్ ఐ ఎంటర్‌టైన్‌‌మెంట్స్ పతాకాలపై మాల్య కందుకూరి, శివకుమార్ రాజంపేట, గడ్డం రవి కుమార్, సంతోష్ జాదవ్ సంయుక్తంగా ఈ చిత్రాన్ని నిర్మిస్తున్నారు. కాగా ఈ సినిమాకు సంబంధించిన టీజర్ లాంచ్ ఈవెంట్‌ను చిత్ర యూనిట్ అత్యంత ఘనంగా నిర్వహించింది. ఈ ప్రత్యేక కార్యక్రమానికి టాలీవుడ్ ప్రముఖ బ్లాక్‌బస్టర్ డైరెక్టర్ త్రినాథరావు నక్కిన ముఖ్య అతిథిగా విచ్చేసి చిత్ర బృందానికి అభినందనలు తెలిపారు.

ఈ కార్యక్రమంలో భాగంగా చిత్ర టీజర్‌ను లాంచ్ చేసిన అనంతరం డైరెక్టర్ త్రినాథరావు నక్కిన మాట్లాడుతూ, నరేన్‌‌కు సినిమాపై ఉన్న ప్యాషన్ తనకు ధమాకా సినిమా రోజుల నుంచే తెలుసని పేర్కొన్నారు. ఈ టీజర్‌లో ఆ ప్యాషన్ స్పష్టంగా కనిపిస్తోందని, ఇప్పటికే తాను ఈ సినిమా చూశానని, కథతో పాటు భీమ్స్ సంగీతం, కెమెరా వర్క్ అన్నీ చాలా అద్భుతంగా వచ్చాయని ప్రశంసించారు. ఒక సినిమాను రూపొందించి విజయవంతంగా ప్రేక్షకుల ముందుకు తీసుకురావడం గొప్ప సాహసమని, ఈ సినిమా కచ్చితంగా పెద్ద విజయం సాధించాలని తాను కోరుకుంటున్నట్లు ఆయన తెలిపారు. నూతన ప్రతిభను ప్రోత్సహించేలా ఉన్న ఈ చిత్రం ప్రేక్షకులను కచ్చితంగా అలరిస్తుందని ధీమా వ్యక్తం చేశారు.

హీరో నరేన్ వనపర్తి మాట్లాడుతూ, భీమ్స్‌తో తనకు ఇరవై ఏళ్ల స్నేహం ఉందని, ఈ ప్రాజెక్ట్‌లో ఆయన మ్యూజిక్ అందించడమే కాకుండా కథపరంగా ఇచ్చిన విలువైన సూచనలు తమకు ఎంతగానో ఉపయోగపడ్డాయని వెల్లడించారు. కిరణ్ అందించిన కథ ప్రేక్షకులకు ఒక నెక్స్ట్ లెవల్ అనుభూతిని పంచుతుందని, సినిమా చూసి ప్రతి ఒక్కరూ ఆశ్చర్యపోతారని చెప్పారు. సంగీత దర్శకుడు భీమ్స్ సిసిరోలియో మాట్లాడుతూ, ఎలాంటి లాభాపేక్ష లేకుండా అందరం కలిసి ఒక నిజాయితీతో కూడిన మంచి కాన్సెప్ట్ ఉన్న సినిమా చేశామని, ఈ పద్ధతిగల చిత్రం అందరి ఆలోచనలను రేకెత్తిస్తుందని పేర్కొన్నారు. ఈ వేడుకలో ప్రముఖ నిర్మాత బెక్కం వేణుగోపాల్, దర్శకుడు మహేష్ నాంపల్లి తదితరులు పాల్గొని సినిమా విజయంపై తమ నమ్మకాన్ని వ్యక్తం చేశారు. నవంబర్ 20వ తేదీన ఈ సినిమా ప్రేక్షకుల ముందుకు రానుంది.