‘మండాడి’ మూవీ టీమ్ను అభినందించిన లోకనాయకుడు కమల్ హాసన్.. వంద కోట్ల క్లబ్లో జోరు!
సూర్య ఎంటర్టైన్మెంట్ డెస్క్: సుహాస్ మరియు సూరి ప్రధాన పాత్రల్లో మతిమారన్ పుగళేంది దర్శకత్వంలో తెరకెక్కిన సంచలన చిత్రం ‘మండాడి’ బాక్సాఫీస్ వద్ద దూసుకుపోతూ వంద కోట్ల క్లబ్లో చేరిన విషయం తెలిసిందే. ఆర్ఎస్ ఇన్ఫోటైన్మెంట్ బ్యానర్పై ఎల్రెడ్ కుమార్ నిర్మించిన ఈ చిత్రానికి తెలుగు రాష్ట్రాల్లో మైత్రి మూవీ డిస్ట్రిబ్యూటర్స్ ద్వారా అద్భుతమైన ఆదరణ లభించింది. ఇప్పటికే సూపర్ స్టార్ రజినీకాంత్ ఈ సినిమా బృందాన్ని ప్రత్యేకంగా అభినందించగా, తాజాగా యూనివర్సల్ హీరో కమల్ హాసన్ స్వయంగా ‘మండాడి’ టీమ్ను అభినందించడం ప్రాధాన్యత సంతరించుకుంది.
చిత్ర యూనిట్ను ప్రత్యేకంగా ఆహ్వానించిన కమల్ హాసన్, దర్శకుడు, నిర్మాతతో పాటు సూరి, సుహాస్, రవీంద్ర విజయ్ తదితరులతో వ్యక్తిగతంగా ముచ్చటించి సినిమాలోని ప్రతిభను కొనియాడారు. ఈ అరుదైన అనుభూతి తన జీవితంలో ఎప్పటికీ మరువలేనిదని, కమల్ హాసన్ సర్ కురిపించిన ప్రేమ తమకు ఎంతో ప్రత్యేమని నటుడు సూరి సోషల్ మీడియా వేదికగా తన ఆనందాన్ని పంచుకున్నారు. లెజెండరీ నటుడి నుంచి వచ్చిన ఈ ప్రశంసలు సినిమా స్థాయిని మరింత పెంచడంతో పాటు చిత్ర బృందానికి కొండంత బలాన్నిచ్చాయని చెప్పవచ్చు.
సినిమాలోని బోట్ సీక్వెన్స్, రేసింగ్ దృశ్యాలు ప్రేక్షకులను థ్రిల్ చేయగా, కథిర్ సినిమాటోగ్రఫీ మరియు జీవీ ప్రకాష్ అందించిన నేపథ్య సంగీతం ఈ చిత్రానికి ప్రధాన బలంగా నిలిచాయి. పీటర్ హెయిన్, దిలీప్ సుబ్బురాయన్, మహేష్ మాథ్యూ కంపోజ్ చేసిన యాక్షన్ సీక్వెన్స్లు ప్రేక్షకులకు సరికొత్త థియేట్రికల్ అనుభూతిని పంచాయి. సూరి మరియు సుహాస్ అద్భుతమైన నటనతో పాటు బలమైన కథాంశంతో తెరకెక్కిన ఈ చిత్రం ప్రపంచవ్యాప్తంగా విజయవంతంగా ప్రదర్శించబడుతూ బాక్సాఫీస్ వద్ద సరికొత్త రికార్డులను సృష్టిస్తోంది.
