ఏఐ వీడియోల దుర్వినియోగంపై హీరోయిన్ జాన్వీ కపూర్ సంచలన వ్యాఖ్యలు.. అది లైంగిక వేధింపులతో సమానం!
సూర్య ఎంటర్‌టైన్‌మెంట్ డెస్క్: దేవర సినిమాలోని చలసనై చుట్టమల్లే పాటకు సంబంధించిన మార్ఫింగ్ వీడియోల వివాదంపై ప్రముఖ నటి జాన్వీ కపూర్ తీవ్రస్థాయిలో స్పందించారు. టెక్నాలజీ పెరుగుతున్న కొద్దీ దానిని కొంతమంది అసాఘిక శక్తులు తప్పుదారి పట్టిస్తున్న తీరుపై ఆమె తీవ్ర అసహనం వ్యక్తం చేశారు. ఇటీవల సోషల్ మీడియాలో ఏఐ సాంకేతికతను ఉపయోగించి కొందరు వ్యక్తులు ఈ పాటకు సంబంధించిన విజువల్స్‌ను అత్యంత అసభ్యకరంగా మార్ఫింగ్ చేసి వైరల్ చేశారు. ఈ ఘటనపై ఇప్పటికే హీరో ఎన్టీఆర్ తీవ్ర ఆగ్రహం వ్యక్తం చేయగా, తాజాగా జాన్వీ కపూర్ సైతం సోషల్ మీడియా వేదికగా తన ఆవేదనను, ఆగ్రహాన్ని వెళ్లగక్కుతూ సుదీర్ఘమైన పోస్ట్ పెట్టారు.
ఆర్టిఫిషియల్ ఇంటెలిజెన్స్ టెక్నాలజీని ఉపయోగించి మహిళలను కించపరిచేలా కంటెంట్‌ను రూపొందించడం మరియు ప్రచారం చేయడం అత్యంత అవమానకరమైన చర్య అని జాన్వీ పేర్కొన్నారు. ఇది కేవలం టెక్నాలజీ దుర్వినియోగం మాత్రమే కాదని, దాదాపు లైంగిక వేధింపులకు ఏమాత్రం తీసిపోని తీవ్రమైన ఉల్లంఘన అని ఆమె అభివర్ణించారు. చిత్ర పరిశ్రమలో పనిచేస్తున్న ప్రతి నటి ఏదో ఒక రూపంలో ఇలాంటి వేధింపులను ఎదుర్కొంటూనే ఉందని ఆవేదన వ్యక్తం చేశారు. ఒక మహిళకు మరియు ఆమె శరీరానికి గౌరవం ఇవ్వడం మానవత్వంలో అత్యంత ప్రాథమికమైన విషయమని, కానీ కొందరు దీనిని విస్మరించి నీచమైన చర్యలకు పాల్పడుతున్నారని మండిపడ్డారు.
మహిళల వ్యక్తిగత స్వేచ్ఛను, హక్కులను హరించేలా సోషల్ మీడియాలో జరిగే ప్రచారాలపై సమాజం తీవ్రంగా స్పందించాలని జాన్వీ పిలుపునిచ్చారు. ఒక మహిళ ఏ రకమైన దుస్తులు ధరించాలి? తన జీవితానికి సంబంధించి నిర్ణయాలు ఎలా తీసుకోవాలి? అనేది పూర్తిగా ఆమె వ్యక్తిగత హక్కు అని స్పష్టం చేశారు. కేవలం ఫ్యాషన్ లేదా సినిమాల ఆధారంగా మహిళలను తప్పుగా అంచనా వేయడం, వారిని అసభ్యకరంగా చిత్రించడం క్షమించరాని నేరమని పేర్కొన్నారు. డిజిటల్ ప్రపంచంలో రోజురోజుకూ పెరుగుతున్న ఈ సరికొత్త భయాలు మహిళల మానసిక ప్రశాంతతను దెబ్బతీస్తున్నాయని ఆమె ఆందోళన వ్యక్తం చేశారు.
ఈ క్లిష్ట సమయంలో తనకు మరియు మహిళా లోకానికి మద్దతుగా నిలిచిన ప్రతి ఒక్కరికీ జాన్వీ ప్రత్యేక కృతజ్ఞతలు తెలిపారు. ఈ వివాదంపై ఎలాంటి మొహమాటం లేకుండా ధైర్యంగా స్పందించిన ఎన్టీఆర్‌కు ప్రత్యేకంగా ధన్యవాదాలు తెలుపుతూ, ఇలాంటి నాయకులు మద్దతుగా నిలవడం ఎంతో ధైర్యాన్ని ఇస్తుందన్నారు. అలాగే చిరంజీవి, విజయ్ దేవరకొండ, ఖుష్బూ తదితరులు ఈ అనైతిక చర్యలను ఖండిస్తూ అండగా నిలిచారని గుర్తుచేశారు. ఏఐ టెక్నాలజీని ఇలాంటి నీచమైన పనులకు వాడుతున్న వారిపై కఠినమైన చట్టపరమైన చర్యలు తీసుకోవాలని, సమాజంలో మార్పు వచ్చేలా ప్రతి ఒక్కరూ ఆలోచించాలని ఆమె కోరారు.
