ఎన్టీఆర్ కోసం ప్రాణం పెట్టి పనిచేశాడు.. కానీ ఆ సినిమా నాకు నచ్చలేదు: దర్శకుడు కృష్ణవంశీ
సూర్య ఎంటర్‌టైన్‌మెంట్ డెస్క్: టాలీవుడ్‌లో తనదైన శైలి చిత్రాలతో ప్రత్యేక గుర్తింపు తెచ్చుకున్న ప్రముఖ సృజనాత్మక దర్శకుడు కృష్ణవంశీ తాజాగా ఇచ్చిన ఓ ఇంటర్వ్యూలో తన సినీ ప్రయాణానికి సంబంధించి పలు ఆసక్తికర విషయాలను పంచుకున్నారు. తన కెరీర్‌లో తెరకెక్కించిన సినిమాలలో తనకు బాగా నచ్చినవి, నచ్చని సినిమాల గురించి ఆయన స్పష్టంగా తెలిపారు. ముఖ్యంగా టాలీవుడ్ స్టార్ హీరో జూనియర్ ఎన్టీఆర్ తో పనిచేసిన అనుభవం గురించి, ఆయనతో తెరకెక్కించిన రాఖీ సినిమా ఫలితంపై ఆయన చేసిన వ్యాఖ్యలు ప్రస్తుతం సినీ వర్గాల్లో తీవ్ర చర్చనీయాంశంగా మారాయి.
ఇంటర్వ్యూలో భాగంగా తాను పనిచేసిన హీరోలలో సినిమా కోసం ప్రాణం పెట్టే వారిలో ఎన్టీఆర్ ఎప్పుడూ మొదటి స్థానంలో ఉంటారని కృష్ణవంశీ కొనియాడారు. సెట్స్‌లో తారక్ చూపించే అంకితభావం మరియు నటనపై ఆయన ఉండే మక్కువ అసాధారణమని ఆయన ప్రశంసించారు. అయితే తన దర్శకత్వంలో వచ్చిన చిత్రాలలో సింధూరం సినిమా తనకు అత్యంత ఇష్టమని చెప్పిన ఆయన, సముద్రం మరియు రాఖీ చిత్రాలు మాత్రం దర్శకుడిగా తనకు వ్యక్తిగతంగా సంతృప్తినివ్వలేదని కుండబద్దలు కొట్టారు. ఎన్టీఆర్ ఎంతో కష్టపడి ప్రాణం పెట్టి నటించినప్పటికీ, రాఖీ సినిమా తనకు పూర్తిగా నచ్చలేదని ఆయన స్పష్టం చేయడం విశేషం.
వ్యక్తిగత అభిరుచులు మరియు ఇతర దర్శకుల సినిమాలపై కూడా కృష్ణవంశీ తన మనసులోని మాటలను పంచుకున్నారు. రామ్ గోపాల్ వర్మ తెరకెక్కించిన నాచ్ సినిమాలోని వాస్తవికత, మానవ సంబంధాలు మరియు భావోద్వేగాలు తనకు ఎంతగానో ఇష్టమని ఆయన పేర్కొన్నారు. అలాగే తన సమకాలీన దర్శకులలో శేఖర్ కమ్ముల సినిమాలలోని సున్నితమైన రొమాన్స్, స్వీట్‌నెస్ మరియు సహజత్వం తనకు చాలా ఇస్తమని తెలిపారు. సినిమా లేని జీవితాన్ని తాను అసలు ఊహించుకోలేనని, భార్య లేని జీవితం లేదా సినిమా లేని జీవితం అనే ఆప్షన్ వస్తే తాను ఖచ్చితంగా సినిమానే ఎంచుకుంటానని ఆయన సరదాగా వ్యాఖ్యానించారు.
