నెట్‌ఫ్లిక్స్ 'ఆపరేషన్ సఫేద్ సాగర్'లో త్రివర్ణ పతాక ప్రదర్శనపై వివాదం: తప్పును ఎత్తిచూపిన ఆర్మీ వెటరన్
నెట్‌ఫ్లిక్స్ వేదికగా స్ట్రీమింగ్ అవుతున్న 'ఆపరేషన్ సఫేద్ సాగర్' వెబ్ సిరీస్ ప్రస్తుతం వివాదంలో చిక్కుకుంది. ఇటీవల విడుదలైన ఈ షో భారతదేశంలో ట్రెండింగ్‌లో నిలిచి ప్రశంసలు అందుకుంటున్నప్పటికీ, ఒక దృశ్యంలో జాతీయ జెండా అమరికపై అభ్యంతరాలు వ్యక్తమయ్యాయి. స్క్వాడ్రన్ లీడర్ అజయ్ అహుజా అంత్యక్రియల సన్నివేశంలో త్రివర్ణ పతాకాన్ని కప్పిన విధానంలో తప్పు జరిగిందని ఆర్మీ వెటరన్ బహిరంగంగా గుర్తుచేశారు.భారతీయ సైనిక దళాలకు చెందిన రిటైర్డ్ కల్నల్ వేంబు శంకర్ సోషల్ మీడియా వేదికగా ఈ లోపాన్ని ప్రస్తావించారు. సర్వీస్ హెడ్‌క్వార్టర్స్, మిలిటరీ అడ్వైజర్లు ఈ తీవ్రమైన పొరపాటును ఎలా విస్మరించారంటూ ఆయన ప్రశ్నించారు. ఈ మేరకు ఇన్‌స్టాగ్రామ్‌లో సంబంధిత సన్నివేశానికి సంబంధించిన స్క్రీన్‌షాట్‌ను ఆయన షేర్ చేస్తూ అసంతృప్తి వ్యక్తం చేశారు.
ఆ ఫొటో ఆధారంగా, జెండాలోని కాషాయ రంగు భాగం తల వైపు ఉండాల్సి ఉండగా, అందుకు విరుద్ధంగా ఆకుపచ్చ రంగు కనిపించిందని ఆయన వివరించారు. ఈ సిరీస్‌లోని నాల్గవ ఎపిసోడ్‌లో ఈ సన్నివేశం చోటుచేసుకుంది. ఫ్లయింగ్ ఆఫీసర్ సి.హెచ్. బాల్ రెడ్డి, ఫ్లయింగ్ ఆఫీసర్ రాజ్‌పాల్ సింగ్ ధాలివాల్ తదితరులు స్క్వాడ్రన్ లీడర్ అజయ్ అహుజా భౌతిక కాయాన్ని మోసుకెళ్తున్న దృశ్యంలో ఈ త్రివర్ణ పతాక దోషం బయటపడింది.ఈ వెబ్ సిరీస్‌లో అజయ్ అహుజా పాత్రలో సిద్ధార్థ్ నటించగా, మిహిర్ అహుజా, అభయ్ వర్మ తదితరులు ఇతర కీలక పాత్రల్లో కనిపించారు. ఆగస్టు 7న విడుదలైన ఈ సిరీస్ భారతదేశంలో 'టాప్ 10 షోస్' జాబితాలో మొదటి స్థానంలో ట్రెండ్ అవుతూ ప్రేక్షకులను ఆకర్షిస్తోంది. అయితే, జాతీయ పతాక నిబంధనలకు సంబంధించిన ఈ వివాదం ప్రస్తుతం చర్చనీయాంశంగా మారింది.
