రూ.33 లక్షల కోట్ల భారీ వాల్యుయేషన్‌తో బైట్‌డ్యాన్స్ షేర్ బైబ్యాక్
సూర్య బిజినెస్ డెస్క్: ప్రముఖ సోషల్ మీడియా దిగ్గజం, టిక్‌టాక్ మాతృ సంస్థ అయిన బైట్‌డ్యాన్స్ (ByteDance) గ్లోబల్ మార్కెట్లో మరో సంచలన నిర్ణయానికి తెరతీసింది. తన ప్రస్తుత ఇన్వెస్టర్ల నుంచి భారీ స్థాయిలో షేర్లను వెనక్కి కొనుగోలు (షేర్ బైబ్యాక్) చేసేందుకు ప్రణాళికలు రచిస్తోంది. షేర్‌హోల్డర్లకు రాసిన లేఖ ప్రకారం సుమారు 6 బిలియన్ డాలర్ల (భారతీయ కరెన్సీలో సుమారు రూ.50,000 కోట్లకు పైగా) వ్యయంతో ఈ బైబ్యాక్ ప్రక్రియను చేపట్టనున్నట్లు ప్రముఖ టెక్ మీడియా నివేదిక వెల్లడించింది. ఈ ప్రతిపాదిత బైబ్యాక్ ప్రక్రియలో కంపెనీ మొత్తం వాల్యుయేషన్‌ను సుమారు 400 బిలియన్ డాలర్లుగా (భారత కరెన్సీలో దాదాపు రూ.33 లక్షల కోట్లు) అంచనా వేసినట్లు సమాచారం.
గత ఏడాది నిర్వహించిన బైబ్యాక్ వాల్యుయేషన్‌తో పోలిస్తే ఇది దాదాపు 20 శాతం మేర ఎక్కువ కావడం విశేషం. గతంలో అమెరికాలో టిక్‌టాక్ నిషేధ ముప్పును నివారించేందుకు కుదిరిన ఒప్పందాల తర్వాత బైట్‌డ్యాన్స్ ఆర్థిక పరమైన వృద్ధిని సాధిస్తూ వస్తోంది. అమెరికాలోని టిక్‌టాక్ డేటా సెక్యూరిటీ నిర్వహణ బాధ్యతలను అమెరికన్ సంస్థల సంయుక్త భాగస్వామ్యానికి బదలాయించినప్పటికీ, యాప్ ద్వారా వచ్చే ప్రధాన ఆదాయ వనరులపై బైట్‌డ్యాన్స్ తన పట్టును నిలుపుకోగలిగింది. ఈ పరిణామాల నేపథ్యంలో కంపెనీ మార్కెట్ విలువ క్రమంగా పుంజుకోవడం ఇన్వెస్టర్లలో ఉత్సాహాన్ని నింపుతోంది.
ప్రైవేట్ కంపెనీగా కొనసాగుతున్న బైట్‌డ్యాన్స్ ఈ షేర్ బైబ్యాక్ ద్వారా తన ప్రస్తుత ఇన్వెస్టర్లకు తమ పెట్టుబడులను నగదు రూపంలో మార్చుకునే చక్కటి అవకాశాన్ని కల్పిస్తోంది. టెక్నాలజీ రంగంలో, ముఖ్యంగా ఆర్టిఫిషియల్ ఇంటెలిజెన్స్ (ఏఐ) రంగంలో పోటీ ప్రపంచాన్ని తట్టుకునేందుకు మరియు సంస్థలో కీలక ప్రతిభావంతులను నిలుపుకునేందుకు ఈ బైబ్యాక్ ప్రణాళిక ఎంతగానో దోహదపడుతుందని మార్కెట్ నిపుణులు విశ్లేషిస్తున్నారు. స్టాక్ మార్కెట్లో ఎగబాగుతున్న వాల్యుయేషన్ల నేపథ్యంలో బైట్‌డ్యాన్స్ తీసుకున్న ఈ తాజా నిర్ణయం గ్లోబల్ టెక్ మార్కెట్లో తీవ్ర చర్చనీయాంశమైంది.
