జీఎస్టీ సంస్కరణలతో విశ్వసనీయ పాలన దిశగా కీలక ముందడుగు.. 'డీక్రిమినలైజేషన్' నిర్ణయాలను స్వాగతించిన సీఐఐ!
సూర్య బిజినెస్ బ్యూరో, న్యూఢిల్లీ:** చిన్నపాటి పన్ను ఉల్లంఘనలను నేరాల జాబితా నుంచి తొలగిస్తూ , జీఎస్టీ అధికారుల దర్యాప్తు అధికారాలను హేతుబద్ధీకరిస్తూ జీఎస్టీ కౌన్సిల్ తీసుకున్న నిర్ణయాలపై భారత పరిశ్రమల సమాఖ్య (CII) ప్రశంసల వర్షం కురిపించింది. ఈ మార్పులు దేశంలో విశ్వసనీయ పాలన మరియు సహకార సమాఖ్య స్ఫూర్తి దిశగా వేసిన ఒక విప్లవాత్మక అడుగని సీఐఐ డైరెక్టర్ జనరల్ చంద్రజిత్ బెనర్జీ పేర్కొన్నారు. ముఖ్యంగా సూక్ష్మ, చిన్న, మధ్యతరహా పరిశ్రమలకు (MSMEs), నవతరం వ్యాపారవేత్తలకు ఇది న్యాయపరమైన రక్షణతో పాటు వ్యాపార నిర్వహణలో అనిశ్చితిని తగ్గిస్తుందని వివరించారు.
అక్టోబర్ 8న జరిగిన 57వ జీఎస్టీ కౌన్సిల్ సమావేశంలో కేంద్ర-రాష్ట్ర ప్రభుత్వాలు సాధించిన ఏకాభిప్రాయం ప్రకారం.. సీజీఎస్టీ చట్టంలోని సెక్షన్ 69ని తొలగించడం ద్వారా అధికారులకున్న అరెస్ట్ అధికారాలను రద్దు చేయాలని సిఫార్సు చేశారు. అలాగే ప్రాసిక్యూషన్ పరిమితిని ₹1 కోటి నుంచి ఏకంగా ఐదు రెట్లు పెంచి ₹5 కోట్లకు నిర్దేశించారు. సెక్షన్ 132 పరిధిలోని నిర్దిష్ట నేరాలను పరిమితం చేయడంతో పాటు, న్యాయస్థానాలకు విచక్షణాధికారాలు కల్పిస్తూ కనీస ఆరు నెలల జైలు శిక్ష నిబంధనను తొలగించి, కేవలం జరిమానాతో సరిపెట్టే వెసులుబాటును ప్రతిపాదించారు.
ఈ సంస్కరణల వల్ల సాధారణ విధానపరమైన పొరపాట్లు, వ్యాపార వివాదాలకు మరియు ఉద్దేశపూర్వక మోసాలకు మధ్య స్పష్టమైన వ్యత్యాసం ఏర్పడుతుందని సీఐఐ స్పష్టం చేసింది. "విశ్వసనీయ పాలన అంటే నిబంధనల అమలును బలహీనపరచడం కాదు.. దానిని మరింత సమగ్రంగా, నిష్పాక్షికంగా మరియు పారదర్శకంగా అమలు చేయడమే" అని బెనర్జీ వ్యాఖ్యానించారు. ప్రభుత్వం విశ్వాసంతో తీసుకుంటున్న ఈ నిర్ణయాలకు అనుగుణంగా, వ్యాపార సంస్థలు కూడా స్వచ్ఛంద పన్ను చెల్లింపులు, అంతర్గత నియంత్రణలను మరింత పటిష్టం చేసుకోవాల్సిన బాధ్యత ఉందని ఆయన పరిశ్రమలకు సూచించారు.
