andhrapradesh
విద్యుత్ తీగలు తగిలి వృద్ధుడి దుర్మరణం
గాజువాక, సూర్య: తుఫాను గాలులకు తెగిపడిన విద్యుత్ తీగలు తగిలి ఓ వృద్ధుడు దుర్మరణం పాలయ్యాడు. ఈ విషాద ఘటన దువ్వాడ పరిధిలోని మంగళపాలెంలో చోటుచేసుకుంది. స్థానికులు, పోలీసులు తెలిపిన వివరాలు ప్రకారం.. మంగళ పాలెం గ్రామానికి చెందిన అమర పిన్ని దేవుడు (65) అనే వృద్ధుడు బయటకు వెళ్తున్న సమయంలో ఈ ప్రమాదం జరిగింది. తుఫాను గాలుల ధాటికి విద్యుత్ వైర్లు తెగిపోయి మార్గమధ్యలో నిలిచిన వర్షపు నీటిలో పడ్డాయి. ఇది గమనించని ఆయన ప్రమాదవశాత్తు ఆ నీటిలో అడుగుపెట్టడంతో విద్యుత్ షాక్‌కు గురై అక్కడికక్కడే ప్రాణాలు విడిచారు. ప్రమాద సమాచారం అందుకున్న వెంటనే దువ్వాడ పోలీసులు ఘటనా స్థలానికి చేరుకున్నారు. మృతదేహాన్ని స్వాధీనం చేసుకుని, పోస్టుమార్టం నిమిత్తం కేజీహెచ్‌కు తరలించారు. ఈ అకస్మాత్తు ఘటనతో మంగళపాలెం గ్రామంలో తీవ్ర విషాద ఛాయలు అలుముకున్నాయి.
