విద్యుత్ షాక్‌తో యువకుడి మృతి
రేపల్లె, మేజర్ న్యూస్; రేపల్లె మండలం పెనుమూడి గ్రామ పరిధిలోని రొయ్యల చెరువుల వద్ద విద్యుత్ షాక్‌కు గురై చెరుకూరి లక్ష్మీకాంత్ (35) అక్కడికక్కడే మృతి చెందాడు. బుధవారం జరిగిన ఈ సంఘటనతో గ్రామంలో విషాదఛాయలు అలుముకున్నాయి.
రొయ్యల చెరువుల వద్ద మంచినీరు సరఫరా చేసేందుకు వెళ్లిన లక్ష్మీకాంత్ కు విద్యుత్ సరఫరా ఒక్కసారిగా షాక్ ఇవ్వడంతో లక్ష్మీకాంత్ కుప్పకూలినట్లు తెలుస్తోంది. విషయం తెలుసుకున్న 108 సిబ్బంది సంఘటన స్థలానికి చేరుకుని పరిశీలించగా అప్పటికే మృతి చెందినట్లు నిర్ధారించారు. మృతునికి భార్య, కుమార్తె ఉన్నారు. వృద్ధులైన తల్లిదండ్రుల బాగోగులు చూసుకుంటున్న సమయంలో లక్ష్మీకాంత్ దుర్మరణం చెందడం బాధాకరమని కుటుంబ సభ్యులు కన్నీటిపర్యంతమవుతున్నారు. కుటుంబానికి ఆధారంగా ఉన్న యువకుడు అకాల మరణం చెందడంతో వారి రోదనలు మిన్నంటాయి.
సమాచారం అందుకున్న రేపల్లె పోలీసులు కేసు నమోదు చేసుకుని, దర్యాప్తు చేస్తున్నారు.
