శ్రీ లలితా త్రిపురసుందరీదేవిగా కనకదుర్గమ్మ దివ్యదర్శనం

ఇంద్రకీలాద్రి, మేజర్ న్యూస్: ఇంద్రకీలాద్రిపై శరన్నవరాత్రి ఉత్సవాల్లో ఐదో రోజైన గురువారం శ్రీ కనకదుర్గమ్మవారు శ్రీ లలితా త్రిపురసుందరీదేవి అలంకారంలో భక్తులకు దివ్యదర్శనం ఇవ్వనున్నారు. బంగారు వర్ణపు చీరలో సర్వాలంకార శోభితగా దర్శనమివ్వనున్న జగన్మాతను పరాశక్తి స్వరూపిణిగా, శ్రీచక్ర అధిష్ఠానశక్తిగా భక్తులు కొలుస్తారు. చెరకు విల్లు, పుష్పబాణాలు, పాశాంకుశాలను ధరించిన అమ్మవారి దివ్యరూపం భక్తులకు ఆధ్యాత్మిక అనుభూతిని అందించనుంది. సంప్రదాయం ప్రకారం అమ్మవారికి పులిహోర, పెసర బూరెలను నైవేద్యంగా సమర్పించనున్నారు. శ్రీ లలితా త్రిపురసుందరీదేవి ఆరాధనలో లలితా సహస్రనామ పారాయణం, కుంకుమార్చన, శ్రీచక్రారాధనలకు విశేష ప్రాధాన్యం ఉంది. అమ్మవారిని దర్శించుకునే భక్తులు కుటుంబ క్షేమం, ఆరోగ్యం, ఐశ్వర్యం, సుఖశాంతులు కలగాలని ప్రార్థిస్తారు. శరన్నవరాత్రి ఉత్సవాలకు తరలివచ్చే భక్తులకు సౌకర్యవంతమైన దర్శనం కల్పించేందుకు దేవస్థానం, పోలీసు శాఖ, జిల్లా యంత్రాంగం సమన్వయంతో ఏర్పాట్లు చేపడుతున్నాయి. భక్తులు అధికారుల సూచనలు పాటిస్తూ క్యూలైన్లలో క్రమశిక్షణతో ముందుకు సాగి జగన్మాత అనుగ్రహాన్ని పొందాలని అధికారులు కోరుతున్నారు.