సీఐఐ సదస్సుకు పగడ్బందీ ఏర్పాట్లు
- జిల్లా కలెక్టర్ కిషోర్
ఆనందపురం: ఆనందపురం మండలం గంభీరంలోని ఐఐఎం-వీలో బుధవారం జరగనున్న సీఐఐ ప్రాంతీయ సదస్సును అన్ని శాఖల అధికారులు సమన్వయంతో విజయవంతం చేయాలని జిల్లా కలెక్టర్ ఎం.అభిషిక్త్‌ కిశోర్‌ ఆదేశించారు. మంగళవారం ఆయన ఏపీఈడీబీ సీఈవో సగిలి షాన్మోహన్‌, పరిశ్రమల శాఖ మేనేజింగ్‌ డైరెక్టర్‌ బన్షాల్‌, జేసీ విద్యాధరి, డీసీపీ మణికంఠ తదితరులతో కలిసి సదస్సు ఏర్పాట్లను పరిశీలించారు.
ప్రధాన వేదిక, సమాంతర సమావేశాలు, ప్రదర్శన, ఏపీ పెవిలియన్‌, ప్రతినిధుల నమోదు, వాహనాల నిలుపుదల, మౌలిక వసతులు, సూచిక బోర్డులు, ప్రతినిధులకు కల్పించాల్సిన సౌకర్యాలను పరిశీలించారు. సదస్సుకు హాజరయ్యే ప్రముఖులు, పారిశ్రామికవేత్తలు, వివిధ సంస్థల ప్రతినిధులకు ఎలాంటి అసౌకర్యం కలగకుండా ఏర్పాట్లు చేయాలని సూచించారు.
కేంద్ర మంత్రి రామ్మోహన్‌ నాయుడు, రాష్ట్ర మంత్రులు టీజీ భరత్‌, బీసీ జనార్దన్‌రెడ్డి, ఉత్తరాంధ్ర ప్రజాప్రతినిధులు, పారిశ్రామిక సంస్థల ప్రతినిధులు, పారిశ్రామికవేత్తలు హాజరుకానున్న నేపథ్యంలో ఎలాంటి లోటుపాట్లకు తావివ్వరాదన్నారు. ఉత్తరాంధ్రలో పెట్టుబడులకు ఉన్న అవకాశాలు, పారిశ్రామికాభివృద్ధికి అనుకూల వాతావరణం, మౌలిక వసతులు, వనరులు, ప్రభుత్వం అందిస్తున్న ప్రోత్సాహకాలను పారిశ్రామికవేత్తలకు వివరించేలా సదస్సును నిర్వహించాలని సూచించారు. అన్ని శాఖల అధికారులు పరస్పరం సమన్వయంతో పనిచేసి అప్పగించిన బాధ్యతలను సమర్థంగా నిర్వర్తించాలని కలెక్టర్ ఆదేశించారు.
