రామతీర్థంలో ఘనంగా శ్రీరామచంద్రస్వామి పవిత్రోత్సవాల ముగింపు..

నెల్లిమర్ల, సూర్య : ​ప్రసిద్ధ పుణ్యక్షేత్రమైన రామతీర్థం శ్రీ రామస్వామి వారి దేవాలయంలో కొన్ని రోజులుగా అత్యంత వైభవంగా జరుగుతున్న పవిత్రోత్సవాలు గురువారంతో ముగిశాయి. ఈ సందర్భంగా ఆలయంలో నిర్వహించిన పలు ధార్మిక కార్యక్రమాలు భక్తులను ఎంతగానో ఆకట్టుకున్నాయి.
​ఉత్సవాల్లో భాగంగా గురువారం ఉదయం శ్రీ రామచంద్రస్వామి వారికి ప్రాతఃకాలార్చన, బాలభాగం నిర్వహించారు. అనంతరం స్వామివారికి అలంకరించిన పవిత్రములను శాస్త్రోక్తంగా విసర్జించి, యాగశాలలో మహా పూర్ణాహుతి కార్యక్రమాన్ని వైభవంగా జరిపించారు.
​అనంతరం ఆలయ ఆస్థాన మండపంలో శ్రీ రామచంద్రస్వామి వారికి అత్యంత కనులపండువగా కళ్యాణం, పట్టాభిషేక మహోత్సవాన్ని నిర్వహించారు. ఈ వేడుకలో ఆలయ సహాయ కమిషనర్ వై. శ్రీనివాసరావు, 40 మంది రుత్వికులు ఆలయ సిబ్బంది, విశేష సంఖ్యలో భక్తులు పాల్గొని స్వామివారి కృపకు పాత్రులయ్యారు.

రిపోర్టర్ : రాజారావు, నెల్లిమర్ల, విజయనగరం జిల్లా.