ప్రజల ఆశీస్సులతో జనసేన వీరమహిళ విజయలక్ష్మి గునుకుల నామినేషన్

నెల్లూరు, మేజర్ న్యూస్ :       ప్రజాసేవే పరమావధిగా, 21వ డివిజన్ అభివృద్ధే ప్రధాన లక్ష్యంగా జనసేన పార్టీ కూటమి అభ్యర్థిగా విజయలక్ష్మి గునుకుల శనివారం నామినేషన్ దాఖలు చేశారు.  జనసేన నాయకులు కిషోర్ గునుకుల నివాసం నుంచి పార్టీ నాయకులు, కార్యకర్తలు, వీరమహిళలు, అభిమానులు, మద్దతుదారుల సమక్షంలో ఉత్సాహంగా బయలుదేరిన ఆమె, స్థానిక ఎనమలవారిదిన్నె వద్ద ఉన్న RO  కార్యాలయంలో నామినేషన్ పత్రాలను సమర్పించారు.  ఈ సందర్భంగా విజయలక్ష్మి గునుకుల మాట్లాడుతూ,“ఈ నామినేషన్ కేవలం ఎన్నికల ప్రక్రియ కాదు… మా డివిజన్ ప్రజలపై మాకున్న బాధ్యతకు, వారి అభివృద్ధి పట్ల మాకున్న నిబద్ధతకు నిదర్శనం”  అని పేర్కొన్నారు.ఇప్పటికే డివిజన్‌లోని ప్రతి గడపను పలకరిస్తూ, ప్రజల సమస్యలను తెలుసుకుంటూ, వారి ఆప్యాయతను, ఆదరణను హృదయపూర్వకంగా స్వీకరించామని తెలిపారు. ప్రజలు తమపై చూపుతున్న నమ్మకాన్ని నిలబెట్టుకుంటూ, రానున్న రోజుల్లో మరింత అంకితభావంతో ప్రజలకు అందుబాటులో ఉంటూ డివిజన్ అభివృద్ధికి కృషి చేస్తామని స్పష్టం చేశారు. జనసేన అధినేత, ఉప ముఖ్యమంత్రి శ్రీ పవన్ కళ్యాణ్  చూపిన ప్రజాసేవా స్ఫూర్తిని ఆదర్శంగా తీసుకుని, మంత్రి శ్రీ పొంగూరు నారాయణ   అభివృద్ధి దృక్పథాన్ని స్ఫూర్తిగా చేసుకుని, ప్రజా సమస్యల పరిష్కారమే ధ్యేయంగా ముందుకు సాగుతామని తెలిపారు. తన భర్త, జనసేన నాయకులు కిషోర్ గునుకుల సహకారంతో ప్రజల ఆకాంక్షలకు అనుగుణంగా పనిచేస్తామని పేర్కొన్నారు.

“మాకు రాజకీయాలు పదవుల కోసం కాదు… ప్రజలకు సేవ చేయడానికి ఒక అవకాశం. ప్రతి ఇంటి సమస్య మా సమస్యగా భావించి, ప్రతి కుటుంబం అభివృద్ధిలో భాగస్వామి అయ్యేలా కృషి చేస్తాం. ప్రజలు మాపై ఉంచిన నమ్మకమే మా బలం… వారి ఆశీస్సులే మా విజయం”  అని భావోద్వేగంగా తెలిపారు. నామినేషన్ కార్యక్రమానికి విచ్చేసి తమకు మద్దతుగా నిలిచిన ప్రతి నాయకుడికి, కార్యకర్తకు, వీరమహిళకు,  అభిమానులకు, శ్రేయోభిలాషికి ఆమె హృదయపూర్వక కృతజ్ఞతలు తెలియజేశారు. రానున్న ఎన్నికల్లో అందరూ ఐక్యంగా కృషి చేసి, 21వ డివిజన్‌లో కూటమి విజయానికి సహకరించాలని విజ్ఞప్తి చేశారు.

ప్రజలతోనే ప్రయాణం… ప్రజల కోసమే పోరాటం… అభివృద్ధే మా సంకల్పం! జై జనసేన! జై పవన్ కళ్యాణ్!