ప్రజాస్వామ్యం గురించి జగన్ మాట్లాడటం విడ్డూరం
గుంటూరు: ప్రజాస్వామ్యం, నైతిక విలువల గురించి వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌మోహన్‌రెడ్డి మాట్లాడటం విడ్డూరంగా ఉందని గుంటూరు పశ్చిమ తెలుగుదేశం పార్టీ ఎమ్మెల్యే గళ్లా మాధవి విమర్శించారు. నామినేషన్ల గడువు పొడిగింపుపై సుప్రీంకోర్టు ఇచ్చిన ఆదేశాలు ఏదో ఒక పార్టీకి మాత్రమే పరిమితం కావని, అందరికీ సమానంగా వర్తిస్తాయని స్పష్టం చేశారు.
న్యాయస్థానం ఇచ్చిన ఆదేశాలను వైఎస్సార్‌ కాంగ్రెస్‌ పార్టీకి ప్రత్యేకంగా లభించిన ప్రయోజనంగా చిత్రీకరించేందుకు జగన్ ప్రయత్నిస్తున్నారని ఆమె ఆరోపించారు. న్యాయస్థానాల నిర్ణయాలను రాజకీయ కోణంలో ప్రచారం చేయడం సరికాదన్నారు.
ప్రజాస్వామ్య వ్యవస్థలో న్యాయస్థానాల ఆదేశాలను గౌరవించాల్సిన బాధ్యత ప్రతి ఒక్కరిపై ఉందని పేర్కొన్నారు. ప్రజాస్వామ్యం, నైతిక విలువల గురించి మాట్లాడే ముందు జగన్ తన వైఖరిని సమీక్షించుకోవాలని గళ్లా మాధవి హితవు పలికారు.
