పెండింగ్‌ కేసులు త్వరగా పరిష్కరించాలి

పామూరు, మేజర్ న్యూస్ :

 పెండింగ్‌లో ఉన్న కేసుల దర్యాప్తును వేగవంతం చేసి త్వరితగతిన పరిష్కరించాలని మార్కాపురం జిల్లా ఎస్పీ వి.హర్షవర్ధన్‌ రాజు పోలీసు అధికారులను ఆదేశించారు. సోమవారం పామూరు సర్కిల్‌ కార్యాలయంలో కనిగిరి సబ్‌డివిజన్‌ పరిధిలోని పోలీస్‌స్టేషన్ల పనితీరు శాంతిభద్రతలు, నేరాల నియంత్రణ, రోడ్డు ప్రమాదాలు, రానున్న స్థానిక సంస్థల ఎన్నికలపై డీఎస్పీ, సీఐలు, ఎస్సైలతో సమీక్షా సమావేశం నిర్వహించారు.

పోలీస్‌స్టేషన్ల వారీగా పెండింగ్‌ కేసులు, అరెస్టులు, దర్యాప్తు వివరాలను అడిగి తెలుసుకున్నారు. యూఐ కేసులను తగ్గించి పెండింగ్‌ కేసులను త్వరగా పరిష్కరించాలని అరెస్టులు, చార్జిషీట్లు, నాన్‌ బెయిలబుల్‌ వారెంట్లు పెండింగ్‌లో లేకుండా చర్యలు తీసుకోవాలని సూచించారు. స్థానిక సంస్థల ఎన్నికలను ప్రశాంతంగా నిర్వహించేందుకు ముందస్తు ప్రణాళికతో సిద్ధం కావాలని సమస్యాత్మక, అతి సమస్యాత్మక ప్రాంతాలను గుర్తించి పటిష్ట సమాచార వ్యవస్థ ఏర్పాటు చేసుకోవాలని ఆదేశించారు. రోడ్డు ప్రమాదాల నివారణకు డ్రంక్‌ అండ్‌ డ్రైవ్‌ తనిఖీలు ముమ్మరం చేయాలని బ్లాక్‌స్పాట్లు, ప్రమాదాలకు అవకాశం ఉన్న ప్రాంతాల్లో ప్రత్యేక చర్యలు చేపట్టాలని అన్నారు. వాహనదారులు ట్రాఫిక్‌ నిబంధనలు పాటిస్తూ పోలీసులకు సహకరించాలని కోరారు.

పేకాట, కోడిపందాలు, బహిరంగ ప్రదేశాల్లో మద్యం సేవించడం, ప్రజా ప్రశాంతతకు భంగం కలిగించే అసాంఘిక కార్యకలాపాలపై నిఘా పెంచి చట్టపరమైన చర్యలు తీసుకోవాలని ఎస్పీ ఆదేశించారు.సమావేశంలో కనిగిరి ఇన్‌చార్జి డీఎస్పీ పి.శ్రీధర్‌, పామూరు సీఐలు వినోద్‌కుమార్‌,పొదిలి సీఐ ఎం. రాజేష్‌కుమార్‌, కనిగిరి సీఐ శ్రీనివాసరావు, ఎస్బీ ఇన్‌స్పెక్టర్‌ శ్రీనివాసరావు, డీసీఆర్‌బీ ఇన్‌స్పెక్టర్‌ దేవప్రభాకర్‌, ఐటీ కోర్‌ ఇన్‌స్పెక్టర్‌ జగదీష్‌, పామూరు ఎస్ఐ అనూప్, ఎస్సైలు పాల్గొన్నారు.