కారులో 22 కిలోల గంజాయి

ఇద్దరి అరెస్టు.. మరో ఇద్దరు పరారీ

ఘట్‌కేసర్ రూరల్, మేజర్ న్యూస్ (సెప్టెంబర్ 21) : ఒడిశా నుంచి గోవాకు భారీగా ఎండు గంజాయిని తరలిస్తున్న కారును ఉప్పల్‌ ఎస్‌వోటీ, పోచారం ఐటీ కారిడార్‌ పోలీసులు సంయుక్తంగా పట్టుకున్నారు. కారులోని నాలుగు బ్యాగుల్లో ఉన్న 22 కిలోల ఎండు గంజాయిని స్వాధీనం చేసుకుని ఇద్దరిని అరెస్టు చేశారు. ఈ ఘటన సోమవారం మధ్యాహ్నం పోచారం ఐటీ కారిడార్‌ పోలీస్‌స్టేషన్‌ పరిధిలోని యంనంపేట్‌ చౌరస్తా సమీపంలో చోటుచేసుకుంది. పోలీసులు తెలిపిన వివరాల ప్రకారం.. విశ్వసనీయ సమాచారం మేరకు కిట్టీ స్టీల్‌ కంపెనీ సమీపంలో వాహన తనిఖీలు చేపట్టారు. ఈ క్రమంలో మారుతి సుజుకీ బలెనో కారు (జీఏ 07 హెచ్‌ 3746)ను ఆపి తనిఖీ చేయగా డిక్కీలో నాలుగు బ్యాగుల్లో 22 కిలోల ఎండు గంజాయి లభించింది. గోవాలోని పనాజీ, కాజన్‌-జాలెంకు చెందిన అనిల్‌కుమార్‌ గౌడ (30), తాలిగావ్‌కు చెందిన అవినాష్‌ శర్మ (25)ను అరెస్టు చేశారు. వారి నుంచి రెండు సెల్‌ఫోన్లు, ఓ కత్తిని స్వాధీనం చేసుకున్నారు. స్వాధీనం చేసుకున్న గంజాయి విలువ సుమారు రూ.24 లక్షలు ఉంటుందని పోలీసులు అంచనా వేశారు. గంజాయిని గోవాలో ఎవరికి విక్రయించేందుకు తరలిస్తున్నారనే కోణంలో దర్యాప్తు చేస్తున్నారు. ఈ వ్యవహారంతో సంబంధం ఉన్న మరో ఇద్దరు నిందితులు పరారీలో ఉన్నట్లు పోలీసులు తెలిపారు. కేసు నమోదు చేసి దర్యాప్తు చేస్తున్నారు.