నలపరెడ్డిపల్లి–మురగళ్ల–కనుపూరుపల్లి రహదారి పనులు ప్రారంభించాలి

నెల్లూరు కలెక్టరేట్ (మేజర్ న్యూస్)  :  ఆత్మకూరు మండలంలోని నలపరెడ్డిపల్లి–మురగళ్ల–కనుపూరుపల్లి గ్రామాలను కలిపే ప్రధాన రహదారి నిర్మాణ పనులను వెంటనే ప్రారంభించి పూర్తి చేయాలని వైఎస్సార్ కాంగ్రెస్ పార్టీ ఆత్మకూరు మండల ఎస్సీ సెల్ అధ్యక్షుడు తోడేటి అశోక్ కోరారు.  ఈ మేరకు బుధవారం నెల్లూరు కలెక్టరేట్‌లో జాయింట్ కలెక్టర్ మొగిలి వెంకటేశ్వర్లును కలిసి వినతిపత్రం అందజేశారు. మూడు గ్రామాల ప్రజలతో కలిసి సేకరించిన సంతకాల పత్రాలను కూడా జాయింట్ కలెక్టర్‌కు అందించారు.  రహదారి అధ్వానంగా ఉండటంతో విద్యార్థులు, రైతులు, మహిళలు, వృద్ధులు, వాహనదారులు ఇబ్బందులు ఎదుర్కొంటున్నారని అశోక్ తెలిపారు. రహదారి నిర్మాణానికి టెండర్ ప్రక్రియ పూర్తయి రెండు నెలలు గడిచినా పనులు ప్రారంభం కాలేదని పేర్కొన్నారు.  ఎన్నికల కోడ్ అమల్లోకి వచ్చేలోపు పనులను ప్రారంభించేలా సంబంధిత అధికారులకు ఆదేశాలు ఇవ్వాలని ఆయన జాయింట్ కలెక్టర్‌ను కోరారు. ప్రజల సమస్యను పరిశీలించి త్వరితగతిన చర్యలు తీసుకోవాలని విజ్ఞప్తి చేశారు.