కోరిన కోర్కెలు తీర్చే కల్పవల్లి మానసా దేవి!
వరికుంటపాడు, మేజర్ న్యూస్ : కోరిన కోర్కెలు తీర్చే కల్పవల్లిగా భక్తులచే పూజలందుకుంటున్న మానసా దేవి అమ్మవారు చంద్రఘంట అలంకారంలో భక్తులకు దర్శనమిచ్చారు. వరికుంటపాడు మండల పరిధిలోని తూర్పు రొంపిదొడ్ల గ్రామంలో వెలసి ఉన్న మానసా దేవి ఆలయంలో దసరా శరన్నవరాత్రి ఉత్సవాలు వైభవంగా కొనసాగుతున్నాయి. నవరాత్రి ఉత్సవాల్లో భాగంగా అమ్మవారిని చంద్రఘంట అలంకారంలో సుందరంగా అలంకరించి ప్రత్యేక పూజలు, అర్చనలు నిర్వహించారు. అమ్మవారిని దర్శించుకునేందుకు పరిసర గ్రామాల నుంచి భక్తులు పెద్ద సంఖ్యలో తరలిరావడంతో ఆలయ ప్రాంగణం భక్తజన సందోహంతో కిటకిటలాడింది. భక్తులు అమ్మవారికి మొక్కులు చెల్లించుకుని తీర్థప్రసాదాలు స్వీకరించారు. అమ్మవారి కృపతో ప్రజలందరూ సుఖసంతోషాలతో, ఆయురారోగ్యాలతో ఉండాలని భక్తులు ప్రార్థించారు. భక్తిశ్రద్ధలతో సాగుతున్న శరన్నవరాత్రి వేడుకలతో తూర్పు రొంపిదొడ్ల గ్రామంలో ఆధ్యాత్మిక శోభ నెలకొంది. ఆలయాన్ని పలు రకాల పుష్పాలు విద్యుత్ దీపాలతో సుందరంగా అలంకరించారు.
