కాలం చెల్లిన ఆంబులెన్స్ లతో రోగులకు అవస్థలు.

కళ్యాణదుర్గం టౌన్ ప్రతినిధి రంగా :-

అత్యవసర సమయాల్లో ప్రాణాలను కాపాడాల్సిన అంబులెన్స్‌లే మార్గమధ్యలో మొరాయిస్తుండటంతో రోగులు, వారి కుటుంబ సభ్యులు తీవ్ర ఇబ్బందులు ఎదుర్కొంటున్నారు. కుందుర్పి మండల పరిధిలోని ఆపలేపల్లి గ్రామానికి చెందిన వడ్డే లక్ష్మణమూర్తి పాము కాటుకు గురికావడంతో కుటుంబ సభ్యులు వెంటనే కుందుర్పి ప్రాథమిక ఆరోగ్య కేంద్రానికి తరలించారు. అక్కడ ప్రాథమిక చికిత్స అందించిన అనంతరం పరిస్థితిని దృష్టిలో ఉంచుకుని మెరుగైన వైద్యం కోసం కళ్యాణదుర్గం ఆసుపత్రికి తరలించాలని వైద్య సిబ్బంది సూచించారు. దీంతో అంబులెన్స్‌లో రోగిని కళ్యాణదుర్గం తరలిస్తుండగా ఆపలేపల్లి గ్రామ సమీపంలో వాహనం అకస్మాత్తుగా మార్గమధ్యలోనే నిలిచిపోయింది. అత్యవసర వైద్యం అవసరమైన రోగిని తీసుకెళ్తున్న సమయంలో అంబులెన్స్‌ చెడిపోవడంతో కుటుంబ సభ్యులు తీవ్ర ఆందోళనకు గురయ్యారు. పాము కాటు ఘటనలో సమయం ఎంతో కీలకమైనప్పటికీ వాహనం ముందుకు కదలకపోవడంతో రోగి పరిస్థితిపై బంధువులు భయాందోళన వ్యక్తం చేశారు. చేసేదేమీ లేక చివరకు బాడుగ వాహనాన్ని ఏర్పాటు చేసుకుని రోగిని అందులో కళ్యాణదుర్గం ఆసుపత్రికి తరలించాల్సి వచ్చింది. అత్యవసర పరిస్థితుల్లో వేగంగా స్పందించి రోగులను సకాలంలో ఆసుపత్రులకు చేర్చాల్సిన అంబులెన్స్‌లు తరచూ సాంకేతిక సమస్యలకు గురవుతున్నాయని మండల ప్రజలు ఆవేదన వ్యక్తం చేస్తున్నారు. పాత వాహనాలను నిర్వహణ పేరుతో నడిపించడం వల్ల అత్యవసర సేవలకు ఆటంకం కలుగుతోందని వారు పేర్కొంటున్నారు. ముఖ్యంగా పాము కాటు, ప్రమాదాలు, గర్భిణుల తరలింపు, గుండె సంబంధిత అత్యవసర పరిస్థితులు, ఇతర ప్రాణాపాయ సందర్భాల్లో ఒక్కో నిమిషం కూడా ఎంతో విలువైనదని, ఇలాంటి సమయంలో అంబులెన్స్‌ మార్గమధ్యలో నిలిచిపోతే రోగుల ప్రాణాలకు ముప్పు ఏర్పడే అవకాశం ఉందని ఆందోళన వ్యక్తం చేస్తున్నారు. కుందుర్పి మండలంలోని గ్రామీణ ప్రాంతాలకు అంబులెన్స్‌ సేవలు అత్యంత అవసరమైనప్పటికీ, అందుబాటులో ఉన్న వాహనాల పరిస్థితి సరిగా లేకపోవడం వల్ల ప్రజలు ఇబ్బందులు ఎదుర్కొంటున్నారని తెలిపారు. అంబులెన్స్‌లకు క్రమం తప్పకుండా సర్వీసింగ్‌, సాంకేతిక తనిఖీలు నిర్వహించాలని, అత్యవసర సమయంలో వాహనాలు మొరాయించకుండా ముందస్తు చర్యలు చేపట్టాలని కోరుతున్నారు. అవసరమైతే కాలం చెల్లిన పాత అంబులెన్స్‌లను తొలగించి వాటి స్థానంలో కొత్త, మెరుగైన వాహనాలను అందుబాటులోకి తీసుకురావాలని మండల ప్రజలు ప్రభుత్వాన్ని విజ్ఞప్తి చేస్తున్నారు. కుందుర్పి మండలంలోని అన్ని గ్రామాలకు అత్యవసర సమయాల్లో నిరంతర అంబులెన్స్‌ సేవలు అందేలా అధికారులు ప్రత్యేక దృష్టి సారించి, ఇలాంటి ఘటనలు పునరావృతం కాకుండా చర్యలు తీసుకోవాలని ప్రజలు కోరుతున్నారు.