గోసుపాటి నారాయణమ్మ నేత్రదానం – ఇద్దరు అంధులకు వెలుగు ప్రసాదించే అవకాశం

ప్రొద్దుటూరు, మేజర్ న్యూస్ : 

ప్రొద్దుటూరు పట్టణం బాలాజీ నగర్ కి చెందిన గోస్పాటి నారాయణమ్మ (75) మరణించిన అనంతరం ఆమె కుటుంబ సభ్యులు నేత్రదానానికి అంగీకరించి మరోసారి సమాజానికి ఆదర్శంగా నిలిచారు. మృతురాలి కుమారుడు చంద్ర ఓబుల్ రెడ్డి, కోడలు కళావతి నేత్రదానానికి సమ్మతి తెలుపుతూ జిల్లా అంధత్వ నివారణ సంస్థ మరియు పులివెందుల స్నేహిత అమృత హస్తం సేవాసమితి నేత్ర సేకరణ కేంద్రం అధ్యక్షులు మొమ్మెల రాజుకు సమాచారం అందించారు. సమాచారం అందుకున్న వెంటనే నేత్ర సేకరణ కేంద్రం టెక్నీషియన్ అరవింద్ మృతురాలి నివాసానికి చేరుకుని పార్ధివ దేహం నుంచి రెండు కార్నియాలను సేకరించారు. అనంతరం వాటిని హైదరాబాద్‌లోని డాక్టర్ అగర్వాల్ నేత్రనిధికి తరలించినట్లు రాజు తెలిపారు. ఈ సందర్భంగా రాజు మాట్లాడుతూ, “నేత్రదానం అనేది మరణానంతరం కూడా ఇతరుల జీవితాల్లో వెలుగు నింపే మహోన్నత దానం. గోస్పాటి నారాయణమ్మ కుటుంబ సభ్యులు తీసుకున్న నిర్ణయం ఇద్దరు అంధులకు చూపును అందించే అవకాశం కల్పిస్తుంది. సమాజంలోని ప్రతి ఒక్కరూ నేత్రదానంపై అవగాహన పెంచుకుని తమ కుటుంబ సభ్యులతో ఈ విషయంపై చర్చించి ముందుకు రావాలి” అని పిలుపునిచ్చారు. అలాగే గోస్పాటి కుటుంబం గతంలో కూడా సేవాభావాన్ని చాటుకున్నదని ఆయన పేర్కొన్నారు. నారాయణమ్మ భర్త, డీసీసీ బ్యాంక్ విశ్రాంత అసిస్టెంట్ జనరల్ మేనేజర్ గోస్పాటి ఓబుల్ రెడ్డి 2016లో మరణించినప్పుడు నేత్రదానంతో పాటు కడప రిమ్స్‌కు శరీరదానం చేసిన విషయాన్ని గుర్తు చేశారు. ఇప్పుడు నారాయణమ్మ మరణానంతరం కూడా కుటుంబ సభ్యులు నేత్రదానం చేయడం ద్వారా మానవతా విలువలకు నిదర్శనంగా నిలిచారని ప్రశంసించారు. ఈ సందర్భంగా గోస్పాటి నారాయణమ్మకు ఘన నివాళులు అర్పించిన పలువురు, ఆమె కుటుంబ సభ్యుల సేవాభావాన్ని అభినందిస్తూ మరెందరో నేత్రదానానికి ముందుకు రావాలని ఆకాంక్షించారు.ఈ సందర్బంగా నేత్రదానం చేసిన కుటుంబ సభ్యులకు బంధువులు, సన్నిహితులు, స్నేహ సేవాసమితి అధ్యక్షులు మధుసూదన్ రెడ్డి,సేవాసమితి బృందం కృతజ్ఞత అభినందనలు తెలిపారు.