ఏపీ ప్రభుత్వ ఉద్యోగులకు తీపికబురు.. వరుసగా నాలుగు రోజుల సెలవులు! ఎన్నికల విధుల్లో ఉన్నవారికి మాత్రం మినహాయింపు లేదు

అమరావతి రేణిగుంట మేజర్ న్యూస్: ఆంధ్రప్రదేశ్ ప్రభుత్వ ఉద్యోగులకు రాష్ట్ర ప్రభుత్వం తీపికబురు అందించింది. మహర్నవమి పర్వదినాన్ని పురస్కరించుకుని అక్టోబర్ 19వ తేదీ సోమవారాన్ని సాధారణ సెలవు దినంగా ప్రకటించింది. దీంతో శని, ఆదివారం సెలవులతో పాటు సోమవారం మహర్నవమి, మంగళవారం దసరా సెలవు కలిపి వరుసగా నాలుగు రోజులపాటు సెలవులు లభించనున్నాయి. ఈ మేరకు సాధారణ పరిపాలన శాఖ (జి.ఏ.డి) ఉత్తర్వులు జారీ చేసింది. అయితే, స్థానిక సంస్థల ఎన్నికల ప్రక్రియలో, ఎన్నికలకు సంబంధించిన విధుల్లో ఉన్న అధికారులు, సిబ్బంది మాత్రం తమకు కేటాయించిన విధులకు యథావిధిగా హాజరుకావాలని ప్రభుత్వం స్పష్టం చేసింది. సోమవారం సెలవుకు బదులుగా నవంబర్ 14వ తేదీ రెండో శనివారాన్ని పనిదినంగా ప్రకటించింది. దీంతో ఎన్నికల విధుల్లో లేని ప్రభుత్వ ఉద్యోగులు వరుస సెలవులను వినియోగించుకునే అవకాశం లభించింది.